Яшавда гьар адам оьз ерин тапгъанча, къысмат бизин ойларыбызны элеклеп, сонг буса уллу шагьра-шавлалы ёлгъа чыгъа­рагъандай токътавсуз ишлей де ишлей. Тек там сагьатны къалагъы оьмюрюбюзню оьлчейгени къулакъгъа да гирмей къала. Гече къургъан планлар, ойлар эртенге башгъа болуп чыгъагъандай, сабий заманыбыздагъы масъалаларыбыз да гюн  сайын, сагьат са­йын башгъара туруп, яшав даимликге савгъат этген касбулар сайлана.

 

Яхсайда тувгъан, оьс­ген, билим алгъан Зайира Къурбановна Умарованы талигьи де шолай болгъан деп пикирлешемен. Олай ойлашагъанымны аслу себеби – Зайира Къурбановна да школада охуйгъан йылларында доктор болажакъман деп ойлашса да, тек муаллимни касбусу бирден-эки ону хыялларын тюбюкъарадан башгъа эте. «Неге буса да билмеймен, – дей Зайира Къурбановна бизин булангъы лакъырында, – биринчи муаллимим Райиса Сотавовна Ибавованы бизге дарс береген ва дарсларда оьзюн тутагъан, бизин булан сёйлейген, иржаягъан кюйлери гёз алдымдан таймай эди. Муна шолар бары да муаллим касбугъа сюювюмню артдыргъан».

Гертилей де, 11 класны битдирген Зайира Дагъыс­тан пачалыкъ педагогика университетни башлапгъы класланы факультетине заочно охума тюшмеклиги де биринчи муаллимине бакъгъан сюювю болгъандыр. Гьали буссагьатда да, арадан нечесе йыллар гетген буса да, Зайира Къурбановна Райиса Сотавовнаны атын уллу гьюрмет булан эсгере.

– Эки минг еттинчи йыл мени яшланы яратывчулукъ Уьюне ишге алдылар. Магъа «Милли йырлар» деген кружок тапшурулгъан эди. Гьар байрамгъа къыйышывлу милли йырлар гьазирлей эдик, – дей Зайира.

Ондан къайры да, З. Умарова къызланы яхсай тастарлар сокъма уьйретегенин де эсгермекни тийишли гёремен.

– Сиз бу йыл июль айда Хасавюртда оьтгерилген халкъ яратывчулугъуну экинчи фестивалында ортакъчылыкъ этген деп эшитген эдик…

– Дурус айтасыз. Шо фестивальда оьзюм тохугъан яхсай тастарларым булан ортакъчылыгъымны болдурдум ва шагьарны башчысы Корголи Корголиевни къолу басылгъан дипломгъа ес болдум. Фес­тиваль Расул Гьамзатовну 100 йыллыкъ юбилейи булан байлавлу эди. Гетген йыл буса халкъ маданиятыны яшланы Бютюнроссия фестивалыны регион оьлчевюндеги тиретинде ортакъчылыкъ этгеним учун, Дагъыстан Республиканы билим берив ва илму министри Я. Бучаев биринчи даражалы Диплом булан савгъатлады.

– Яхсай тастарлар тохуйгъан яхсайлы тиштайпаланы гьакъында респуб­лика телевидениеде де гёрсетди деп тураман?

– Гёрсетди. Шо гьакъда къумукъ берилиш де болду.

Къошум билим берив тармакъда шайлы сынав къазангъан Зайира Умарова гиччипавланы биринчи класгъа гьазирлейген кюйлерин айтагъанда уллу ажайыплыкъ этип тынглайман ва шо бир вакътини ичинде ондагъы оьз ишине сюювюн де, къайсы муаллимде де болма тийишли сабурлукъну да гьис этемен. Мени эсиме гелеген кюйде, ол оьзю охума, язма, санама, йырлама гьатта бийиме де уьйретеген яшлары гьакъда хыйлы заман хабарлама бола. Шо буса оьз ишине гьакъ герти берилгенликни белгисидей гёрюне.

Муаллим, тарбиялавчу Зайира Къурбановна агьлюсю Абдулла булан уьч къызны оьсдюрелер. Амина 9-нчу, Жамиля 4-нчю, Камилла буса 2-нчи класны охувчулары.

Яхсай тастар тохувда мекенли сынав топлагъан Зайира Къурбановна Нальчикде, Магьачкъалада оьтгерилеген тюрлю-тюрлю фестивалланы ортакъчысы болгъандан къайры, бу ишине уллу къызы Аминаны да татындырма бажаргъан.

Ким биле, бара-бара Амина да анасы йимик тастарлар тохур, гиччи къызардашларына яхсай тастарны тарихин англатар. Зайира Умарова буса  бу охув йыл, оьзюню он еттинчи загьмат алтын гюзюн янгы гюч, янгы талпыныв-ругьланыв булан къаршылажагъына шексиз инанма болабыз.

 

Магьаррам АЛИМГЬАЖИЕВ.