Оьтген гюнлерде Бабаюрт районну ёлбашчысы Даниял Исламов, район администрацияны ишлерин юрютеген  Жамиля Дибирова ва районну халкъыны къуллукъларын кютеген управлениесини ёлбашчысы Тимур Батырханов люксембурглу загьматны ветераны, тылны загьматчысы ва Уллу Ватан давну ортакъчысыны олжасы Написат Шагьтемировнаны 100 йыллыкъ юбилейи булан къутлап, ону уьюнде болдулар.

Даниял Исламов юбиляргъа исси къутлав сёзлер айта туруп, огъар савлукъ, парахат яшав, аявлу ва ювукъ адамларыны гьай этивюн ёрай туруп, гюл байлам ва савгъатлар тапшурду.

Написат Шагьтемировна Оьтевова 1924-нчю йыл Къачалай юртда тувгъан. Ол лап да къыйынлы дав ва давдан сонггъу йылланы талчыгъын сезген игит нас­луланы арасындан бири болуп токътай. Люксембург юртдан немис халкъ сюргюн этилинген сонг, къачалайлылар онда гёчюрюле. Написатны да янгы яшаву шонда башлана.

Написат яш чагъындан уллу болуп пенсиягъа чыкъ­гъанча юртдагъы Карл Либк­нехтни атындагъы кол­хозда загьмат тёкген. Дав йылларда 17 йыл чагъын­дагъы Написат колхозну авлакъларында уллулар булан бирге будай да оргъан, чёп де алгъан, ашлыкъ да къайтарып, тарыкъ болгъанда салам ва бичен аракълар да этген. Немис-фашистлер Кавказгъа ювукъ гелгенде буса, оьзюню тенглилери булан окоплар къазгъан ва топ гюллелерден сакъланмакъ учун этилеген оборона къурулушларда да ишлеген.

Н. Отевова — адам булан тез гьаллашагъан, гелишли, яхшы ва буссагьатда да загьматны сюеген адам. Агьлюсю Измидин булан ол беш яшны тарбиялагъан. Ол гечинген сонг, яшланы бар намусун оьз башына алып, къысмат шолай гёрсетген сонг, бюдюремей, оланы тюз ёллагъа салма бажаргъан.

Бугюнлерде Н. Отевова уланы ва ону татывлу агьлюсю булан, кёп санавдагъы авлетлерини яшлары ва оланы да яшларыны сюювюн ва гьайлы янашывун гьис этип сююнюп яшай.

Юз йыл оьмюр сюргенде де, Написат Оьтевова бирде яшавгъа кант этмеген. Ол даим юртлулары булан гьаллаша, оланы ишлери, яшаву гьакъда билмеге сюе, оланы барын да атлары булан эсгере. Къайгъысына теренден къыйнала, яхшылыкъларындан буса гьакъ юрекден сююне.

Тек ону оьмюр бою бир къайгъысы терен ойгъа сала — дюньядан гетген эки авлети, агьлюсю, аявлу ва ювукъ адамлары.

– Кёплер гетди бу дюньядан, амма яшав узатыла. Бир-бирде айланада бошлукъ, маънасыз яшав деп эсиме геле. Амма, авлетлерим, оланы авлетлери, балалары булан шо ойларымны толумлашдырагъанны гьис этемен, – дей Н. Отевова.

Биз де Написат Шагьтемировнагъа савлукъ, аявлу адамлары булан насипли яшав ёрайбыз.

 

Герейхан Гьажиев,

бизин мухбирибиз.

 

Суратда:  Даниял Исламов – юбилярны къутлай.