Оьзлени къурч загьматы булан Бабаюрт районну экономика якъдан оьсювюне болушлукъ этгенлер гьар къайсы юртларда да бар. Савлай оьмюрюн къайратлы загьмат булан тыгъыс кюйде байлап, элине гьалал кюйде къуллукъ этип, халкъ арада герти гьюрмет ва сый къазангъанлар аз тюгюл.

Люксембурглу Казибат Мусаева да шолай загьматгъа берилгенлени бириси деп айтмагъа толу ихтиярым бар деп эсиме геле.

Ол 1957-нчи йылда тувгъан. Ата юрту Люксембургда шо замангъы 8 класлыкъ школаны битдирип, бир гюн де бош турмай, юртдагъы Карл Либкнехтни атындагъы колхозда ишге гиришген.

Бир башлап жагьил къызъяш колхозну председатели тапшургъан ишлени кютюп гелген. Сонггъа таба ону жигерлигин ва иттилигин эс этип, колхозну фермасында савунчу этип белгилей. Савунчу болуп ишлейгенде Казибат ярышларда гьар даим де алдынлыкъны алып гелген.

Шо йылларда Казибат комсомол къурумну сыдрасына къошулуп, жаваплыгъына жаваплыкъ, бажарывлугъуна бажарывлукъ салып ишге байлангъан. Гьар йыл дегенлей  ишинде гёрсетген гьаракаты учун  «Социалист ярышны алдынлысы» деген белгиге лайкълы болгъан.  Ол кёп санавдагъы Гьюрметлев грамоталар ва баракалла кагъызлар булан да савгъатлангъан. Казибат Мусаевагъа  «Загьматны ветераны» деген медаль да тапшурулгъан. Гечесин-гюнюн бир этип ишине берилген Казибатгъа савгъат гьисапда Венгрия пачалыкъгъа бармагъа путёвка да берилген.

– Шо заманда комсомол къурумну секретары болуп ишлейген Нариман Абсаламов магъа путёвка тапшургъан гюню бугюн йимик эсимде къалгъан,–дей Казибат. – Мендеги сююнчню дазусу ёкъ эди. Неге тюгюл, шо заманларда тыш пачалыкълагъа ким де барып болмай эди. Магъа буса шолай  насип болду.

Яшав ёлунда Казибатгъа юртлу улан Оразали Мусаев  ёлугъуп, эки сюйген бир болуп, талайлы ожакъ тикгенлер. Мусаевланы агьлюсюнде уьч авлет: эки улан ва бир къыз тувгъан. Олар намуслу-ягьлы болуп оьсген, тарбия-билим алгъан. Шолайлыкъда, Казибат сююмлю олжа, насипли ана болгъан.  Бугюнлерде буса ол талайлы уллана.

Казибатны уланлары Салим ва Марат бугюнлерде Украина бойлардагъы хас асгер гьаракатда биринчилерден болуп жанлы кюйде ортакъчылыкъ эте. Марат Россия асгер булан дыгъар байлагъан,  оьзю­ню яшавун Ватанны якълавчусу гьисапда къургъан. Иниси хас асгер гьаракатда ортакъчылыкъ этегенни билгенде, агъасы Салим де уьйде парахат олтуруп болмагъан.­ Ол да гёнгюллю кюйде хас асгер гьаракатда ортакъчылыкъ этмеге гьазирлигин билдирген.

Бизин ата- бабаларыбызны алтын ерден, батыр элден чыгъар деген айтыву бар. Мусаевлени агьлюсюнден чыкъгъан уланлар батыр да дюр, игит де деп айтып болабыз.  Къоркъув билмейген агъа-ини Салим ва Марат Мусаевлар дав савгъатлагъа да лайыкълы болгъан, нече керен яра тийгенине де къарамайлы, буссагьатда да хас асгер гьаракатда ортакъчылыкъ этивюн узата.

– Мен бизин уьлкени Президенти Владимир Путин оьтгереген политиканы бютюнлей якълайман. Мени уланларым пачалыкъны аманлыгъын ва парахатлыгъын сакълайгъанына оьктем боламан. Миллетчилеге къаршы туруп, олар шонда яшайгъан  халкъны якълай. Озокъда, ана гьисапда гьар гюн юрегим уланларым булан. Аллагь насип этсин  бары да уланлар уьс­тюнлюк къазанып, уьйлерине къайтып,  кёп сюеген азиз адамлары булан ёлукъмагъа, – деп хабарын узата Казибат .

Ол 1991-нчи йылда чагъы гелип,  пенсиягъа чыкъса да, уьйде парахат турмагъа чоласы ёкъ. Буссагьатда да ол юртдагъы клубда тазалыкъ болдура. Гьар къайсы тапшурулгъан ишни мекенли, ерине етишдирип уьйренген Казибат, бу ишни де ким де сукъланардай кюте.

– Казибат Мусаева бир заманда да загьматгъа арт берген адам тюгюл. Оьзюню чагъына да къарамайлы, ишине тындырыкълы ва жаваплы янаша. Ону ишине бирев де сёз айтып болмажакъ.  Иши йимик, ону юреги де, умутлары да, хыяллары да таза. Инсан якъдан алгъанда да асил таза тиштайпа,  Ватанны герти патриотларын оьсдюрген ана. Огъар алгъыш да, баракалла да тийишли, – деп  кёп сююп хабарлай  ону гьакъында клубну директору Абакар Гьажимуратов.

Оьмюр боюнда Оразали ва Казибат юртда загьмат тёкген. Оразали де колхозда тракторист-механизатор гьисапда анадаш районуну оьсювюне оьз къошумун этген загьматчы. Социалист ярышларда уьст гелип  «Ударник пятилетки» деген белгиге де лайыкълы болгъан. Ол да «Загьматны ветераны» деген медалгъа ес болгъан. Агьлюсю Казибат йимик, Оразали де уьйде рагьат туруп болмай, бугюнлерде юртдагъы школада загьмат тёге.

Загьмат булан талай тапгъан Казибатгъа ва ону агьлюсю Оразалиге  Ватаныны герти патриот ругьда батыр уланланы тарбиялагъаны учун баракалла билдире туруп,  олагъа савлукъ, узакъ оьмюр­ ва арты уьзюл­мейген яхшылыкълар ёрайбыз.

Бэлла ГЬАЖИГЕЛДИЕВА,

Россия Федерацияны журналистлерини союзуну члени.

СУРАТДА: Казибат МУСАЕВА.