Язбашны салкъын ахшамы. Къумукъ театр. Бугюн мунда аты савлай элге айтылгъан белгили, пагьмулу йыравубуз Татам Муратов тувгъанлы 120 йыл битегенликге байлавлу эсделик жыйын оьтгериле. Сагьнада Дагъыстанны халкъ музыка алатларыны оркестри кюйлер согъа.
Залда жыйылгъанланы къулагъына къумукъ милли сигьрулу макъамланы сеслери чалына, сонг йыр башлана…
Йырлайыкъ да йыбанайыкъ,
Яхшы танглар къатгъынча…
Къаравчулар оьзлеге ювукъ макъамланы, йырланы гёнгюллю исси кюйде, харс урувлар булан къаршылай. Гертиден де, йырав оьлсе де, тек ону йырлары оьлмей. Йыры ёкъну – халкъы ёкъ.
Макътавлу йыравну гьюрметине багъышлангъан эсделик ахшамны Дагъыстан пачалыкъ филармонияны чебер ёлбашчысы, Дагъыстанны инчесаниятыны ат къазангъан чалышывчусу Ирина Германовна Нахтигал ачды ва юрютдю.
Толу кюйде ЁЛДАШ №13, 1 апрель 2022 й
