Сентябр айны 27-нде ахшам вакъти Лавашиде болгъан ябушув-атышывларда эки адам оьлген ва беш адам яралангъан. Болгъан агьвалатгъа байлавлу аманлыкъны къоруйгъан къурумлар тергевлени башлангъан.
Дагъыстанны Ич ишлер министерлиги билдиреген кюйде, алдындагъы гюн юртда эки жагьил адам бир-бири булан эришген болгъан. Артындагъы гюн олар юртну ягъасында бирдагъы керен ёлукъгъан. Тек бу гезик оьзлер булан дос-къардашын да алып гелген. Шонда башлангъан ябушувда 30-гъа ювукъ адам ортакъчылыкъ этген.
Ябушувну вакътисинде эки де якъ савутлагъа хармангъан. Тапанча ва автомат булан атышывда оьлгенлер де, яралангъанлар да бар. Лаваши район азархананы баш врачы П.Абдурашитова берген маълуматгъа гёре, оьлгенлени арасында полицияны къуллукъчусу да бар, яралангъанланы экевю бек авур гьалда.
Атышывну юрютгенлер юртдан къачгъанлар. Полицейскийлер оланы атларын токъташдыргъан ва ахтарывгъа берген.
Лавашиде болгъан къайгъылы агьвалатгъа Дагъыстанны Башчысы С.Меликов да сесленген. Ол оьзюню Телеграм-каналында: «Гьар этеген ишигизни артын ойлашыгъыз. Гьислер гетежек, тек шоланы натижалары сизин булан бютюн яшавугъузгъа къалажакъ!» деп язгъан ол.
