9-нчу апрелде Дагъыстанны Башчысы Сергей Меликов тюрлю-тюрлю къуллукъланы ёлбашчылары булан генгеш оьтгерди. Шонда юрт хозяйствогъа айрыча тергев берилди. Артдагъы жума язбашгъы авлакъ ишлени юрюлеген кююне де тергев этилди.
Язбашгъы чачыв ишлени юрюлегенини гьакъында айта тутуп, Дагъыстанны юрт хозяйство ва сурсат министри Мухтарбий Ажеков гюзлюклени гьалын да эсгерди.
Ону сёзлерине гёре, гюзлюклени майданы 100 минг гектаргъа ювукъ, тергевлер гёрсетеген кюйде, оланы гьалы орта.
– Гьали авлакъ ишлеге тергевюбюзню бакъдыргъанбыз,– дей М.Ажеков. – Бу йыл язлыкъланы чачыв майданын 233 минг гектаргъа етишдирме гёз алгъа тутулгъан. Шолардан 36 проценти — емлер учунгъу чачывлар, 32 проценти – тирлик, 18-и – яшылчалар, 5 проценти де къалгъан чачывлар. Чалтик болдурувда да майданлар генглешежек ва 32,2 минг гектаргъа етишежек, шо буса алдагъы йылдан 800 гектаргъа артыкъ бола.
Язлыкъ чачывлагъа алданокъ гьазирлик гёрюлген эди. Йылны башында оьтгерилген жыйында Дагъыстанны Гьукуматыны Председатели А.Абдулмуслимов язлыкъ ишлеге 734 миллион манат гёрсетилгенни айтды ва шолай да 11 минг тон ягъарлыкъ да гьазир экенни эсгерди. Шо замандан берли багьалар да артмады ва сабанчылагъа заманында авлакъ ишлени юрютме имканлыкъ болду.
Дагъы да айтгъанда, артдагъы йылларда ашлыкъ чачагъанлар аслу гьалда сайламлы урлукъланы сайлай. Багьа буса да, гелими шайлы артыкъ бола, шоланы чачыв булан бирге минерал кюйчлевючлени де къолласа, заманында сув да етишсе, Дагъыстанда 45-55 центнер гелим алма бола деп токъташдырыла.
Бугюнлеге ерли чачыв топуракъланы 165 минг гектары сюрюлген ва 55 минг гектары чачылгъан, шо буса гёз алгъа тутулгъанындан дёрт пайдан бир пайы бола.
–Аслу гьалда башлап оьсюмлюклер ва бюртюклю ашлыкълар чачылып битген, — деп давам эте М.Ажеков. – Хасавюрт районда гюлайланны чачыв да башланды. Чакъ шулай турса, язлыкъ чачывланы эртерек битме хыял бар. Техника азлыкъ эте буса да, амал этип турабыз, бугюнлерде авлакъларда 3500 техника ишлей.
Бавлар салыв да йыл сайын арта. Бу йыл 600 гектар ерге бав салма деп гёз алгъа тутулгъан эди буса да, бугюнлеге ерли 720 гектаргъа бала тереклер орнатылып битген. Дагъы да 300 гектаргъа орнатмакъ хыял бар.
Инг де яхшысы — Дагъыстанда бала тереклер болдурув да бир ёрукъгъа салынгъан, гетген йыл республиканы питомниклеринде 1,5 миллион бала терек болдурулгъан.
Оьзюбюзню питомниклерибизде болдурулгъан тереклерден 500 гектаргъа чертлевюк, 162 гектаргъа урлукълу ва сюекли емиш тереклени ва 25 гектаргъа къоз бавлар салынгъан.
Бу ерде республикада 30 мингден де артыкъ ерде бавлар салынгъанны да эсгерейик.
Г.КЪОНАКЪБИЕВ.
