Вакцинаны уллулагъа тюгюл, яшлагъа да этмеге башлагъан демеге ярай. Неге тюгюл де, артдагъы заманларда, айрокъда коронавирусдан яшлар кёп авруйгъандан къайры, касбучуланы маълуматларына гёре, олагъа да тромблар болагъаны ачыкъ этилген. Шо намарт аврув яшланы савлугъуна да къоркъунч гелтирегенин де гьисапгъа алып, олагъа да гёнгюллю кюйде вакцина этмеге гёз алгъа тутулгъан.
Шо мурат булан алдагъы гюнлерде Дагъыстангъа «Спутник-М» маркасыны «Гам-Ковид-Вак-М» деген 3360 доза вакцина гелтиргенлер. Шо вакцина Республика югъагъан аврувланы центрында тийишли кюйде холодильниклерде сакълана.
Шону гезиги булан республиканы шагьарларындагъы, районларындагъы яшлар поликлиникалагъа бакъдыражакълар. Шо вакцинаны ерлеге «Савлукъ сакълав» программагъа гёре, министерликге берилген янгы санитар автотранспорт булан етишдирежек.
Дагъыстанны савлукъ сакълав министерлигини республиканы яш-ларына медицина кёмек этеген къурумуну бёлюгюню начальниги Марина Халимбекова бизге англатгъан кюйде, бир башлап яшланы врачлар тергеп, оланы савлугъуну гьалын билгенде, ата-аналары да къолу булан язып, рази экенин англатгъанда, сонг 12 йылдан 18 йылгъа ерли чагъындагъы яшлагъа, оьрюм яшлагъа вакцина этилежек.
Коронавирус инфекциягъа къаршы яшлар учун гьазирленген вакцина Москвадагъы яшлар поликлиникаларында къолланып, шо савлукъ учун зараллы тюгюл экенин, иммунитетин гётерегенин токъташдыргъанлар.
Коронавирус – Дагъыстанда
17.02.2022 йыл
Авругъанлар –84 275 адам
Сутканы ичинде +607 адам
Къолай болгъанлар – 71 960 адам
Сутканы ичинде + 533 адам
Оьлгенлер – 3 428 адам
Сутканы ичинде +13 адам
