Роспотребнадзорну Дагъыстан управлениеси билдиреген кюйде, Ингушетиядан ва Владикавказдан футбол оюндан ярышларда ортакъчылыкъ этмеге гелген 12 йыллыкъ 11 яш агъуланып, Дербентдеги шагьар азарханагъа тюшген.
Тергевчю къурумну къуллукъчулары ёрайгъанкюйде, яшлар киринегенде денгиз сувдан яда ашамлыкъ маллардан агъуланма бола. Гьали лабораторияда яш футболистлер тургъан ердеги ашханадан алынгъан ашланы ва ичеген сувну сан яны тергелип тура. Тек ярышлагъа барагъанда ёлда бир затлар ашагъанын да гьисапдан тайдырмайлар.
Шо гюнлер шагьарны «Нарын-къала» деген стадионунда 11-12 йыллыкъ яшланы арасында футбол оюндан турнир оьтгериле болгъан. Ярышларда ерли командалар булан бирче оьзге регионлардан гелген яшлар да ортакъчылыкъ этген. Тек къонакъ яшлагъа сююмлю оюнунда гьюнерлерин гёрсетмеге насип болмагъан. Врачлар айтагъан кюйде, гьали оланы савлугъуна къоркъунчлукъ ёкъ. Бугюн-тангала дегенлей олар уьйлерине къайтажакъ.
Прокуратура оьз янындан терегевлени юрюте.
Алав АЛИЕВ.
