Артдагъы гюнлерде районну башчысы Даниял Исламов районну ЖКХ-сыны управлениесини ёлбашчысы Артур Мингалиев булан Адил Янгыюртда 250 яшгъа ери булангъы яшлар бавуну къурулушунда болду.
Эсгерилген юртда бу объектни юртну халкъы кёп эртеден, нечесе йыллар булан гёзлей эди. Къурулуш ишлени ООО «МагМа Групп» юрюте. Юртну башчысы Ашарапутдин Исламов эсгерген кюйде, юртда беш мингден де артыкъ адам яшай. Янгы яшлар бавуну ачылыву буса олар учун уллу даража, сююнч, байрам болажакъ.
– Бугюнлерде юртда школа чагъына етишмеген 250 яш бар. Юртда яшлар баву ёкъгъа гёре, аналар кёбюсю уьйде олтура, бирлери буса, уллаталарыны ва улланаланы тергевюню тюбюнде. Яшав шартлагъа гёре, оланы бары да ювукъда ерлешген юртлардагъы яшлар бавларына йиберип болмай, – дей А. Исламов.
Ондан къайры да, гиччипавлар учун чагъына гёре билим алып болагъан яшлар бавлары ёкъгъа гёре, олар школагъа 1-нчи класгъа гелгенде, гьазирлиги булангъыларындан, охув якъдан оьзлени тенглилеринден артда къала. Шону булан муаллимлер ва яшлар оьзлер де къыйнала. Янгы яшлар баву ишлеп башласа, шо масъалалар чечилежек эди.
ООО «МагМа Групп» деген къурумну ёлбашчысы Сергей Ульченко районну башчысын къурулушну барышы булан таныш эте туруп, гележекдеги планлары гьакъда айтды.
– Бугюнлерде бу объектде 10 адам ишлей. Буссагьатгъы вакътиде кюрчю салынып, ону тюп къабаты ишленип тура. Озокъда, бизге адам гюч етишмей, амма аз вакътини ичинде шо масъаланы да чечме гёз алгъа тутгъанбыз, – дей ол.
Ондан къайры да, ону сёзлерине гёре, гюз-къыш айларда бинаны айлана ягъын онгармагъа имканлыкъ болмажакъгъа гёре, яй вакътиде яшлар бавуну айланасындагъы ишлени де тамамлама къастлылар.
Даниял Исламов оьз гезигинде, гиччипавланы сакълыгъы учун бары да зат болдурулмагъа герекни, ишлер намуслу кюйде оьтгерилмеге ва къурулушну тез заманны ичинде къоллавгъа бермеге алгъасавлу иш гёрмей, ону сан яны яхшы даражада болмагъа герекни де айтды. Ол, тарыкъ болса, гьар заман да кёмек къолун узатажагъын да билдирди.
Районну башы ишчилер булан да лакъырлашып, оланы загьмат шартлары булан таныш болду ва жаваплылыгъы учун баракалла да билдирди.
Адил Янгыюртдагъы яшлар бавуну къурулушу 2023-нчю йылны башында башлангъанны да эсгермеге сюебиз. Гёз алгъа тутулгъан кюйде, ол 2025-нчи йыл къоллавгъа берилежек.
Герейхан ГЬАЖИЕВ,
бизин мухбирибиз.
СУРАТДА: Даниял Исламов – къурулушда.
