Арт заманлар Буглендеги Спорт къалада ябушувланы кёп тюрлю жураларына гёре уллу ва гиччи оьлчевдеги ярышлар чакъда-чакъда оьтгериле. Гертиден де, Ал-Кълычны аты къоюлгъан Спорт къала ичи ва тышы булан бек мукъаятлы этилип онгарылгъан. Демек, ярышлар учун мунда тизив шартлар бар…
Муна, алдындагъы гюнлер эсгерилген Спорт къалада тутушуп ябушувгъа гёре торай яшланы арасында республика оьлчевюндеги гезикли ярыш оьтгерилди. Дагъыстанны бары да ерлеринден дегенлей мунда 400-ге ювукъ яш гюч сынадылар. Тутушувланы гьар бириси «итти» кюйде юрюле эди. Бизин республикабызда тутушуп ябушувгъа баргъан сайын кёп адам къуршалагъаны эсгерилген ярышланы барышында бек арив билине эди.
Бу гезик Бугленни командасына да «насип» иржайгъан кюй яман тюгюл эди. Айтагъаным, 60-70 кило авурлукъда Рустам Басиров 1-нчи ерни алды Дагъы да 5 улан оьз авурлукъларына гёре савгъатлы 3-нчю ерлени къазанды.
А. ЗАЛИМХАНОВ.
