Октябр айны 17-нде республиканы Гьукуматыны гезикли генгешинде Роспотребнадзорну Дагъыстан управлениесини башчысы Залимхан Омариев жыйылгъанлагъа Магьачкъаладагъы школаланы ва яшлар бавларын ашамлыкъ маллар булан таъмин этивге байлавлу маълумат берген. Ол билдирген кюйде, сентябр айдан тутуп юрюлген тергевлени натижасында, «Магьачкъалапродукт» муниципал къурум тахшагьарны билим берив ва тарбиялав идараларына 11 тон ялгъан кама бакъдыргъаны токъташдырылгъан. Гёрюнюшю герти камагъа ошай, тек сан яны яшланы савлугъуна зарал гелтирмеге бола.
Ювукъ арада аманлыкъны къоруйгъан къурумлар да оьз янындан ахтарывланы башлажакъ ва айыплылар законгъа гёре жавапгъа тартылажакъ.
«Магьачкъалапродукт» уругъа ва урушбатчылыкъгъа тарыгъан къурум экени гьакъында тезден айтыла геле эди. Бу йылны август айында Россияны Ахтарыв комитетини Дагъыстан ахтарыв управлениеси къурумну директоруна ва ону заместителине къаршы уголовный ишлер ачгъан эди. Гетген йылны апрель айында «Магьачкъалапродуктну» бёлюгюню начальниги ва бир нече школаланы жаваплы къуллукъчулары ишинден тайдырылды. Олар яшлагъа деп гёрсетилген ашамлыкъ малланы ломайлап учуз багьасына базарлагъа, тюкенлеге сата болгъан. Узакъ къалмай суд гьарисине этген терс ишине гёре тёре гесежек.
Тек шогъар да къарамай, яшланы савлугъуну гьисабына къазанма къарайгъанлар къайтып арагъа чыгъа.
Алав АЛИЕВ.
