Буйнакск районда санларында оьзтёрече аврувлары, яда тетиги бар яшланы савлугъун беклешдирмек муратда, оланы атны уьстюнде олтуртуп,  шайлы заман айландырып, къолайлыгъын болдурмакъны къастын этелер.

Гертиден де, атны уьстюнде олтургъан яшны юреги де ачыла, айланасындагъы яшавгъа къараву да алышына. Атгъа минип гезме къургъан сонг, яшланы санларына пайдасы бар кёп тюрлю упражнениелер де этдирелер.

«Атлыны дюньясы» деген центрны «Дагъыстан» деген филиалында  ачылып иш гёреген клубдагъы гьайрангъа гёзел, оьктем ва саламат  айланышлы атланы гёргенде, ким-ким де олагъа минип бир геземейли, оьтюп гетмеге болмай. Эсгерилген клубда яшланы савлугъун беклешдирмек учун иппотерапия оьтгерилегенден къайры да, олагъа табиатны инг де арив бойларында эркин кюйде ял алма имканлыкъ бериле.

Клубгъа бир керен гелип рагьатланып гетгенлер мунда бирдагъы ва бирдагъы керен де гелип ял алыв заманын къужурлу оьтгерме  муштарлы болалар.

 

Казим КАЗИМОВ.