Хумторкъали районну Тёбе юртундагъы школаны охувчусу 10 йыллыкъ Мугьаммат Ибрагьимов сувда агъып барагъан яшланы къутгъаргъан. Татавул бойда ойнап турагъан 6 ва 4 йыл болагъан яшлар сувгъа йыгъылгъан ва батмагъа башлагъан.
Къычырагъан тавушлагъа чыкъгъан Мугьаммат шоланы оьлюмден къутгъаргъан. Оьтген гюнлерде районну башчысы Айнутдин Зиявутдинов ону ва ата-анасын администрациягъа чакъыргъан ва хатабалагьны алдын алма бажаргъаны учун баракалла билдирген.
– Сени къоччакълыгъынг хатабалагьны алдын алгъан, шо буса уллу адамларда да ёлукъмайгъан тавакаллыкъ. Сен спортда да яхшы уьстюнлюклеге етишгенсен, кёп санавдагъы медаллар да къазангъансан, тек яшланы оьлюмден къутгъаргъаны учун берилгени инг де аслусу болма герек, — деген районну башчысы ва яшгъа эсделик савгъат тапшургъан.
Къ. БИЕВ.
