Марат ШИХАЛИЕВ:
Дагъыстанны къурулуш, архитектура ва яшавлукъ-коммунал масъалала-рына къарайгъан министерлиги билдиреген кюйде бизин республикабызда къурулуш ишлер генг кюйде юрюле. Шону учун яшавну онгайлыкъларындан къоллавчулар артда къалмайгъан кюйде гьар тюрлю къуллукъланы оьлчевлерин ва сан янын болдурув – агьамиятлы масъала.
Белгили болгъан кюйде, яшавлукъ къуллукъланы багьалары да айлана ягъыбызда талаплар артгъан сайын гётерилмеге башлайгъаны англашыла. Шогъар байлавлу болуп республикабызны къоллавчуларыны янындан тувулунагъан кёп къадардагъы соравлагъа гёре Марат Шихалиев гьали-гьалилерде регионну маълумат къуралларыны къуллукъчуларына баянлыкъ берген.
– Бизин республикабызны шагьарларында ва районларында энергия гючлени багьалары артдагъы эки йылны ичинде алышынмай турду. Озокъда, базар экономиканы шартларында транспорт ва энергия гючлер учунгъу багьалар бир-бири булан тыгъыс кюйде байлавлу, – дей ДР-ни энергетика ва тарифлер министерлигини башчысы Марат Шихалиев. – Яшав бир кюйде турмай, айлана якъдагъы онгайлыкълагъа харлы талаплар да артып тура. Айтмагъа сюегеним, айлана якъдагъы талапланы гьисапгъа алып, республикабызда 2024-нчю йылны июль айыны башындан тутуп къоллавчулар учун ягъарлыкъ газ, электрик ток ва сувлагъа токъташдырылгъан багьалары да бир къадар гётерилди.
Дагъы да ачыкъ этип айтсакъ, газ ягъарлыкъны бир кубу къоллавчулар учун 8 процентге арта. Алдагъы 6 манат 56 кепекни орнуна 7,9 манат тёлемеге тюше. Электрик токну бир киловаты алда 3 манат 23 кепек эди буса, гьали 8 процентге кёп болуп, 3 манат 51 кепек оьлчевюнде токъташдырылгъан. Сувну багьасы къоллавчулар учун айры-айры шагьарларда ва районларда башгъа-башгъа оьлчевлерде белгиленген. Магьачкъалада яшайгъанлар алда бир куб оьлчевдеги сувгъа 7 манат 31 кепек тёлей эди буса, гьалиден сонг 11 манат 9 кепек тёлемеге борчлу болажакъ.
Къоллавчуланы янындан яшавлукъ-коммунал багьалар не саялы артып тербейгенине шекли кюйде янашагъанлары бары да англашыла. Шолайлыкъда, айлана якъда къыставуллу гьаллар да тувулуна. Уьстде де эсгерилген кюйде, къоллавчуланы санаву ва оланы талаплары йыл сайын артып тербейгенде йимик, багьалар артагъаны гьакъда да унутмагъа тюшмей. Шо саялы олар онгайлыкълардан артда къалмасын учун янгыртыв ва ярашдырыв ишлени оьтгеривге де айлана якъдагъы багьаланы гьисапгъа алып тийишли харж топлама ва пайдаландырма тарыкъ бола.
Къ. КЪАРАЕВ.
