Дагъыстанны Башчысы Сергей Меликов билим беривню масъалаларын даим де тергевде сакълай. Артдагъы гюнлерде ол вице-премьер Муслим Телякъавов, Дагъыстанны къурулуш, билим беривге ва илмугъа къарайгъан министрлери Артур Сулейманов ва Ягьия Бучаев булан янгы охув йылгъа гьазирликни арагъа салып ойлашды.

Сергей Алимовичге билдирген кюйде, бугюнлерде янгы билим берив идаралар къурула ва мукъаятлы ярашдырыла. «Демография» ва «Билим берив» деген программалагъа гёре бу йыл Дагъыс­танда 22778 яшгъа 54 школа ва 1550 гиччипавгъа ери булангъы яшлар бавлары да ишге салынажакъ. Шолардан биринчи сентябрге 15 янгы школа ва 13 яшлар бавлар ачылажакъ.

Шолай да, 139 школада ярашдырыв ишлер юрюле. Республиканы башчысына билдирген кюйде, 78 идарада ишлер 90 процентге ерли битген.

– Магьачкъала, Къызылюрт, Избербаш шагьарларда ва Хасавюрт, Къурах, Дербент районларда 31-115 миллионгъа дыгъарлар этилинип ишлер юрюле, къалгъанларына 10-30 миллион гёрсетилген,– дей Муслим Телякъавов. – Шоларда террорчулукъгъа ва от тюшювге къаршы ишлер учун да чаралар гёрюле.

Школаланы янгы мебель ва къураллар булан таъмин этмек учун да 1 миллиард манат гёрсетилген.

–Бары да ишлер гёрсетилген замангъа тамамланма герек, шону булан бирге къурулушланы сан янына тергев юрютме тарыкъ,– дей Сергей Меликов.– Мени аслу борчум, янгы ва ярашдырылгъан школаларда охума ва оьзлер сюеген кружок­ларда гёнгю булан турмакъ учун имканлыкълар яратмакъ.