Алдагъы гюнлер Буйнакск районну школаларын оьр ва яхшы къыйматлагъа битдирген охувчулагъа медаллар тапшурувгъа байлавлу шатлы чара оьтгерилди. Район администрацияны гиччи залында юрюлген шо агьвалатда администрацияны башчысы Уллубий Ханмурзаев, районну билим берив управлениесини начальниги Зарема Пахрутдинова, школаланы директорлары, муаллимлер, охувчулар ва оланы ата-аналары ортакъчылыкъ этдилер.

Бу йыл охув ожакъланы оьр ва яхшы къыйматлар булан битдирген охувчуланы арасында Бютюнроссия олимпиадаларда уьст болгъанлар, маданият ва спорт чараланы жагь ортакъчылары да аз тюгюл. Оланы арасында ЕГЭ экзаменден 100 бал алма бажаргъан Чиркей юртдагъы билим берив центрны охувчу къызы да бар.

Охувчуланы билим алывда етишген уьстюнлюклери булан гьакъ юрекден къутлай туруп, районну башчысы Уллубий Ханмурзаев оланы атына исси ва лайыкълы сёзлер багъышлады.

– Бугюн сизин ба­ры­гъыз­ны да охувда йимик, яшавда етишген оьрлюк­леригиз булан къутлайман, – деп башлады сёзюн У. Ханмурзаев. – Сиз етишген натижалар бизин де, муаллимлени де, ата-аналаны да сююндюре. Булай алгъанда, сиз районну ва респуб­ликаны алтын фонду болуп токътайсыз. Заман гете туруп, оьр билимлеге де ес болуп, юрекдеги муратлагъа етишип, анг­лавлу касбучулар болуп гене де гиччи ватаныгъыз­гъа къайтып ишлежек гюнюгюзню къаравуллайбыз. Сиз  бизин оьк­темлигибиз де, аркъа таявубуз да болажакъгъа инанабыз.

Билим берив управлениени начальниги З. Пахрутдинова да охувчуланы, муаллимлени ва ата-аналарын шатлы гюню булан къутлады.

Жыйылгъанланы харс урувларыны тюбюнде охув ожакъланы лап ях­шы къыйматлагъа битдирген 26 да охувчугъа республиканы билим берив ва илму министри Ягьия Бучаевни, муниципалитетни башчысы У. Ханмурзаевни атындан алтын ва гюмюш медаллар, грамоталар, баракалла кагъызлар тапшурулду.

 

Казим КАЗИМОВ.

 

СУРАТДА: медаллар тапшурулагъан вакъти.