Хумторкъали районну администрациясыны янында бу охув йылны яхшы къыйматлагъа тамамлагъанланы савгъатлав оьтгерилди. Орта школаны лап яхшы къыйматлагъа битгенлени арасында Къоркъмаскъала, Темиркъую, Тёбе ва Шавхал Янгыюртдагъы орта школаланы охувчулары 11 медальгъа ес болгъан.
Шавхал Янгыюрт орта школаны охувчусу Гьажиали Мусаев лап яхшы къыйматлагъа ес болгъанланы арасында гюмюш медаль булан савгъатлангъан.
Бу ерде шулай мисалгъа агьамият берме сюемен. Бираз алларда Москва шагьарда ВДНХ-ны янында «Россия» деген халкъара-выставка форумунда охувчуланы Бютюнроссия конкурсуну ортакъчыларын къутлавгъа байлавлу чара оьтгерилген. Умуми кюйде алгъанда шо конкурсда Россияны 21 регионундан гелген 32 команда ортакъчылыкъ этген. Юрт хозяйство ва фермерчилик тармакъда оьз пагьмуларын гёрсетмек учун уьлкени тахшагьарында 14 йылдан 18 йылгъа ерли чагъындагъы яшёрюмлер оьзлени пагьмуларын гёрсетген.
Финалгъа чыкъгъан командаланы арасында 4 команда оьзлени гьаракатын айрыча болдургъан. Шоланы арасында Рязан, Мурманск,Тамбов областлардан ва Дагъыстандан гелген бир команда бар. Хумторкъали районну Шавхал Янгыюрт орта школасыны охувчуларыны теплицада розаланы оьсдюрювге байлавлу сиптечилигин жюрини ортакъчылары арив гёрюп якълай.
Конкурсну финалында охувчулар Гьажиали Мусаев ва Азиза Акъаева «Долина роз» деген бизнес-планын малим этгенлер. Эсгерилген проектни маънасы – школада теплица комплекс къурмакъ. Шавхал Янгыюртлу охувчулар «Гьар яшны уьстюнлюгю» деген федерал проектни алатларын къоллагъанлар.
Юртлу охувчуланы насигьатчылары Зиярат Жапарованы ва Айханум Мусаеваны къасты негьакъ болмагъаны гёрюнюп тура. Биз де оьз гезигибизде юртлу охувчуланы ва оланы муаллимлерин бу уьстюнлюк булан къутлай туруп, олардан энниден сонг дагъы да уллу оьрлюклер къаравуллайбыз.
Гёресиз, гьаракатгъа-берекет дегенлей, Гьажиалини къасткъылыву негьакъ болмагъан.
Алибек САЛАВАТОВ.
