Алдагъы гюнлерде Магьачкъаладагъы У. М. Муртузалиеваны  атындагъы яшав ва загьмат гьаллагъа уьйретив центрында хас школа-интернатланы охувчуларыны арасында волейбол оюндан ярышлар  оьтгерилген.

 

«Кёплени къуршайгъан спортну журасы» деген проектни оьлчевюнде  юрюлген  шо ярышларда Магьачкъала,  Буйнакск, Дербент шагьарларда, Къарабудагъгент, Магьарамгент юртларда иш гёреген хас школа-интернатланы охувчулары  ортакъчылыкъ этген.

Шо ярышланы биринчи гюбюне къуршалгъан командаланы арасында Буйнакскидеги 8 номерли орта школаны охувчулары  биринчи ерге  ес болгъан. Экинчи гюпде буса, Къарабудагъгентдеги хас школа-интернатны охувчулары алдынлыкъ алгъан.

Эсгерилген охув ожакъны ёлбашчысы Иманият Гьажиева бизге билдирегени йимик, шо ярышлар  Дагъыстанны билим берив ва  илму министерлигини ва «Россияны хас Олимпиадасы»  деген  проектни  бизин республикада яшавгъа чыгъарагъанланы сиптечилиги булан юрюле. Алдынлылар бу йыл  Москвада  сентябр  айда оьтгерилежек Россияны хас Олимпиадасыны финал тиретинде ортакъчылыкъ этежек.

 

Насрулла БАЙБОЛАТОВ