Дагъыстанны Гьукуматыны Председатели Узбекистандан гелген къонакълар булан Магьачкъалада Дослукъну уьюнде ёлугъув оьтгерген. Делегацияны ёлбашчысы, Бухара областны гьакими Ботир Зарипов ва делегация булан ёлугъувгъа Дагъыстанны бизнес булан промыш-ленност, текстиль, къурулуш, туризм тармакъларында чалышагъан вакиллери жыйылгъан.

А.Абдулмуслимов гелгенлер булан саламлаша туруп бу йыл май айда Владимир Путинни ва Шавкат Мирзиёевни ёлугъувундан сонг сатыв-алыв ва экономика, илму-техника, яшавлукъ-маданият тармакъларда бирче иш гёрювню дыгъарларына къол салынгъанны айтгъан.

«Биз Ботир Комилович булан Узбекистанда гетген йыл Расул Гьамзатовну 100 йыллыкъ юбилейин оьтгерегенде таныш болдукъ. Юбилей оьр даражада оьтдю. Гьали гьар тюрлю тармакъларда бирче иш гёрювню къайдаларын белгилежекбиз. Эки де якъгъа пайдалы болагъан кюйде тувра аралыкъланы болдуруп иш гёрме гёз алгъа тутулгъан», – деген А.Абдулмуслимов.

Бухара областны гьакими билдирген кюйде, эки де пачалыкъны ёлбашчыларыны ёлугъувундан сонг гьар тюрлю тармакъларда бирче иш гёрювге ёл ачылгъан ва бизин арабызда гьаман да дос аралыкълар болгъан.

«Булай алтын сёзлер бар: «Адамны къолу ишде, юреги Аллагьда». Шону учун да биз мунда яхшы амаллар булан гелгенбиз. Мени булан мунда онлар булан бизнесменлер бар. Гьар тюрлю тармакъларда бирче ишлеме гёз алгъа тутулгъан. Ондан къайры да биз Магьачкъалада сатыв-алыв бизнес ачма сёйлешдик», – деген Бухара областны гьакими.

 

Я. БИЙДУЛЛАЕВ

 

СУРАТДА: Бухарадан гелген делегация Каспийскидеги “Керамогранит Дагестан” деген заводда.