Дагъыстанны Гьукуматыны Председатели А.Абдулмуслимов янгылыкъ яратывчу ва алим Пайзулла Исаев булан ёлукъгъан.

Оьмюрю 90 йыллагъа тармаша турагъан­тамаза шондан алда республиканы гьакимиятыны атына язгъан кагъызында оьзюню илму ахтарывларыны натижасында тувулунгъан янгылыкъларын  касбучуланы чакъырып, оланы арасында арагъа салып ойлашмакъны ва Дагъыстанны бугюнгю яшавунда бары да имканлыкъларындан пайдаланып,  гьар тюрлю тамакъларында генг кюйде къолламакъны  таклиф этген болгъан.

Ёлугъувну башында Пайзулла Исаевич оьзюню яшаву ва касбу ёлуну гьакъында хабарлагъан. Ол 1936-нчы йылда Къакъашурада тувгъан. Ата юртундагъы школаны ва Къарабудагъгентдеги интернатны битдирген. Агъасы  Ирапил (Россияны ва Дагъыстанны ат къазангъан врачы, шаир, язывчу) оьзю йимик медицинаны тангламакъны таклиф этсе де, гележегин санавлагъа ювукъ касбу булан байламагъа токъташгъан. Ленинграддагъы кинотехника институтну битдирген  ва шо институтну кюрчюсюнде оьзюню кандидатлыкъ ишин якълагъан. Асгер институтлар булан тыгъыс байлавлукълар юрютген. Кёп йыллар «Байконурда» ишлеген, бизин гьалиги космонавтларыбыз ва асгерчилерибиз   къоллайгъан хыйлы алатланы ол яратгъан.

Пайзулла агъав чагъына гёре уллу пачалыкъ ишлерден айырылса да, гьали де оьзюню яратывчулукъ гьаракатын ва ахтарывларын токътатмай, узакъ оьмюрню дарманын излей туруп, шогъар байлавлу айрыча китап чыгъаргъан. Гьатта ол экмекни де оьзтёрече бишире. Бир ахтарып, излеп, китапны охуп къарагъыз.

 

Алав АЛИЕВ.