Багьавутдин Гьажаматов Къызылюрт районну лап уллу юртларындан саналагъан Солтан Янгыюртда тувгъан. Ата юртундагъы орта школаны битдирген сонг 1981-нчи йыл Магьачкъаладагъы юрт хозяйство институтгъа охума тюшген. Билим алма гьасирет жагьил улан къасткъылып охуй. Гьар предметден оьр къыйматлар ала туруп, дарс беривчюлени де абурун къазана. 1986-нчы йылда ол институтну къызыл дипломгъа охуп битдире.

 Асгер борчун кютюп къайтгъан сонг Багьавутдин Гьажаматов заочно оьр охув ожакъда охуп, экономика билимлер де ала. Яш чагъындан берли спорт булан машгъул болгъан улан тутушуп ябушувдан гьар тюрлю турнирлерде ортакъчылыкъ этип, кёп керенлер биринчи ерни алгъан.

2005-нчи йылда ол Къызыл­юрт районну администрациясыны башчысы болуп ишлеме башлады. Бу къуллукъда ишлей туруп, районну юртларында ватандашланы къыйнайгъан четим масъалаланы яшавгъа чыгъарып юрюдю. «Бирлик» деген гьаракатны ерли къурумун да ата юрту Солтан Янгыюртда биринчилей ол къурду. Сонг «Единая Россия» деген партияны къуруму да актив кюйде ишлеме башлады. Моск­вада оьтгерилген бу партияны эки съездини делегаты болуп ортакъчылыкъ этди. Россияны Федерация Советини члени Шамил Магьамматович Зайналовну кёмекчиси болуп чалышды. Дагъыстанны промышленнос­туну ва сатыв-алыв министерлигини касбучусу болуп ишлей туруп, бу тармакъда яхшы сынав топлады.

Багьавутдин Арсланалиевич Дагъыстанны халкъларыны «Азан» деген милли жамият бирлешивюню председатели болуп да чалышды.

Эки мингинчи йылдан башлап, ол юреги сююп яратывчулукъ иш булан машгъул болма башлады. Тарихге, илмугъа багъышлангъан йигирма етти китапны автору гьисапда белгили болду. Бир нечесин эсгерейик. «Тюрклени ва къумукъланы тарихи», «Стамбулдан Эндирейге ерли…», «Къумукъ тил. Оьсюв ёллары…», «Башир-Шейх аль-Яхсави. Тарих.», «Биринчи Кавказ давну тарихи. Зор Солтан-Мут»», «Бусурман атлар ва оланы маъналары», «Чирюрт», «Гельбах» ва башгъалары.

Артдагъы йылларда буса поэзиягъа ян тартып, ол кёп санавда шиърулар да язгъан. Олар йырлагъа да салынгъан. 2000-нчи йылдан берли Россияны журналистлерини союзуну члени. 2013-нчю йылдан берли Россияны язывчуларыны союзуну члени. «Дагэнерго» бирлешив билдирген «Лап яхшы адабият асар–2003» деген рес­публика оьлчевде юрюлген ачыкъ конкурсда Багьавутдин язгъан асар биринчи ерни алгъан. Дагъыс­танны Гьукуматыны Гьюрметлев грамотасы булан савгъатлангъан. Дагъыс­танны Башчысыны гьюрметлев грамотасын да алгъан. «Во имя России» ва «За патриотизм» деген медаллар булан савгъатлангъан.

Багьавдин Арсланалиевичге энниден сонг да яратывчулукъ ёлунда уьстюнлюклер ёрайбыз.