Аманлыкъны къоруйгъан къурумлар Дагъыстанны савлукъ-сакълав министрини алдагъы заместители Мазай Рамазановну тутгъанлар. Ол миллионлар булан урушбат алгъан деп айыплана.
Полицияны къуллукъчулары токъташдырагъан кюйде, 2019–2021-нчи йылларда къуллугъундан пайдаланып, онгача къурум булан дыгъар байлагъан болгъан. Шо дыгъаргъа гёре, далапчылар республиканы азарханаларын гьар тюрлю медицина алатлар булан таъмин этмеге герек эди. М. Рамазанов онгача къурумну ёлбашчысындан дыгъар булан гёрсетилген маяланы 10 процентин оьзюне бермекни талап этген ва уьч йылны ичинде 87,7 миллион манат урушбатны алгъан.
М. Рамазанов савлукъ-сакълав министерликде 2018-нчи йылны декабр айындан тутуп, 2021-нчи йылны январ айына ерли ишлеген. Ол 1979-нчу йылда Агъул районну Буркихан деген юртунда тувгъан.
Алав АЛИЕВ.
