Судгъа бакъдырылгъан материаллагъа гёре,  инспекцияда консультант болуп ишлейген М.Магьамматов ва бёлюкню начальниги Я.Муслимов 2022-нчи йылны февраль айында Каспийскидеги къурулуш фирманы башчысындан 1,6 миллион манат урушбатны талап этген болгъан. Сайки, шону булан инспекция эсгерилген къурумда оьтгереген тергевлерин токътатажакъ. Эгер де олар айтагъан кюйде болмаса, фирмагъа салынагъан къодуланы оьлчевю бир нече керен артдырылажакъ.

Аманлыкъны къоруйгъан къурумлар М.Магьамматовну ва Я.Муслимовну  июн  айны 21-нде Магьачкъаладагъы ресторанланы бирисинде урушбат алагъан вакътисинде тутгъан.

Ленин район суд Магьамматовну 6 йылгъа эркинликден магьрюм этмек деген къарарны чыгъаргъан. Туснакъ болжалын огъар къатты низамы булангъы колонияда оьтгерме тюшежек. Муслимов буса, 4,5 миллион манатлыкъ къоду булан къутулгъан.

Оьр суд район судну  къарарын  гючде къойгъан.

Алав Алиев.