Бизин яшавну юрютмесе болмайгъан инг аслу ва агьамиятлы талабына гёре янгы къошулагъан гьар къайсы яш агьлю де анадаш халкъыбызны «Улан десе, уьй тола» деген эжел заманлардан берли айтыла гелеген сынавлу сёзлерине бойсынып, оьзлени башлапгъы авлети улан болур бугъай деген умутуна инамлыгъы барны бирдокъда яшырмайлар. Тюпден-ерден ойлашып йиберсек бу айтывну маънасы дагъы да теренлеге гете: агьлюлерде уланлар тувуп кёп болгъан чакъы, тухумлар-эллер де арта, халкъны аркъа таявлары да къажымас къазыкълардай бегий. Озокъда, Яратгъаныбыз буюргъанны гёрмесе, Ол бергенни, язгъанны къабул этмесе де кюй ёкъ.
Шолай, Буйнакск районну Янгыкъумукъ юртунда яшайгъан Ибрагьим ва Атикат Арсланбековланы татывлу, берекети бетине чыгъып турагъан агьлюсюнде арт-артындан дёрт улан ва бир къыз тувгъан. Адилли ата-ана олагъа тийишли тарбия-билим берип торайтгъанлар, гьарисин оьзлер ушатагъан, арив гёреген тюз ёлуна салма, яшавда янгыз оьзлеге хас ерлерин табып чалышма ругь бергенлер.
Уланланы уллусу Тимур Арсланбеков 1983-нчю йыл апрель айны 6-сында тувгъан, юртдагъы орта школада охугъан ва Дагъыстан пачалыкъ педагогика университетни юристлер гьазирлейген факультетин битдирген. Яш чагъындан тутуп, ол спортну ушу-саньда журасы булан иштагьлангъан, 8 керен Дагъыстанны, 7 керен Россияны чемпионатларында ортакъчылыкъ этген ва алдынлы ерлени къазангъан. 2001- 2002-нчи йылларда Италияда дюньяны кубогу учун юрюлген ярышларда эки де гезик биринчи, 2003-нчю йыл Китайда дюньяны кубогун къазанмакъ учун юрюлген ярышда 3-нчю ерни алгъан, 2004-нчю йыл Азербайжанда оьтгерилген «Чилле ёл» деген турнирде 1-нчи ерге ес болгъан.
Тимур Арсланбеков Дагъыстанда ва Москвада касбучуланы арасында юрюлген тутушувларда да ортакъчылыкъ этген ва уьстюнлюк къазангъан. Ол Халимбекавулдагъы аты дюньягъа белгили «Дюньяны беш ягъы» деген спорт школада тренер гьисапда чалышагъаны да 20 йыл бола.
Экинчиси Руслан 1987-нчи йыл тувгъан, юрт школаны, Буйнакскидеги кооперация университетни охуп битдирип, асгерде къуллукъ этме чакъырылгъан. Сахалин бойда, Курилы атавда асгер къуллугъун кюте туруп, хас дыгъар байлап иш юрютме башлагъан. Бугюнлерде ол Украинаны Донецк областында асгерлени таъминлигин болдурагъан бёлюклерде старшина чинында къуллукъ этивюн узата.
Ибрагьимни ва Атикатны уьчюнчю авлети Арслан 1992-нчи йыл тувгъан. Агъалары йимик ол да юрт школаны, Белгород университетни филиалын охуп битдирген, асгерге чакъырылгъан. Сахалинде инженер-сапёр бёлюклерде къуллукъ эте туруп, 2016-нчы йылны май айында дыгъар байлай ва къысматын асгерде къуллукъ этивге, ана Ватанны аманлыгъын къоруп сакълавгъа багъышлай. 2022-нчи йыл апрел айны орталарында Арслан къуллукъ этеген бёлюкню гече булан Украинаны Камышеваха, сонггъа таба Лисичанск деген юртуну ювугъуна йиберелер.
– Бизге шонда токътап, окоплар къазып, мекенли беклешип гьазирлик гёрме буйрукъ берилди. Бизден ярым чакъырымлар ал якъда украинли асгер бёлюклер къыставуллу кюйде ябушув юрютегенни де англадыкъ, – деп эсге ала Арслан, дав гьаракатгъа къуршалгъан мюгьлетлени. – Душман токътагъан ерлерин къойма борчлу болуп артгъа тартылгъанны гёрюп, оланы орнун тутуп беклешебиз ва гезикли буйрукъну къаравуллайбыз. Эсде ёкъда душманны снайперлери гюллелерин явдурма башлады. Ювукъда бир ёлдашыбызгъа авур яра тийгенни гёрюп, тезликде уьстюне етишип, къоркъунчсуз ерге чыгъармакъны къастын этдим. Айланышымны гёрюп-тергеп турагъан снайперни гюллеси шонда мени де аягъыма батгъан. Ёлдашларым бизин гьазиринде алып къоркъунчсуз ерге чыгъарып, санчастгъа тапшурма бажаргъанлар.
Арсланны Донецк халкъ республикада, Ростов шагьарда, Моздокдагъы госпиталларда ятдырып, ярасы къолайгъа къайтгъанда, контрактыны болжалы да тезокъ битгенни гьисапгъа алып, уьйге, агьлюсюне йиберелер.
Украинаны топурагъында юрюлген хас операцияны барышында миллетчилеге къаршы юрюлген дав гьаракатларда оьзюн къоччакъ кюйде тутуп, лап яхшы ягъындан гёрсетме бажаргъан, асгер борчун намусу булан кютген Арслан Ибрагьимович Арсланбеков Россияны Президенти В. В. Путинни указына гёре Къоччакълыкъны ордени булан савгъатлангъан.
Уланланы гиччиси Абакар 1995-нчи йыл тувгъан, школаны охуп битдирген, Белгород университетни экономика и право бёлюгюн тамамлап, Дагъыстан Пачалыкъ Университетни янында къошум билимлер береген институтну юриспруденция бёлюгюн де битдирген. Ол да агъалары йимик Сахалинде, сержант чинында, разведканы бёлюгюнде дыгъар байлап асгер къуллугъун, Ватанны алдындагъы борчун гьеч бир багьанасыз кюйде кютюп тура.
Казим КАЗИМОВ.
СУРАТЛАРДА: Арслан(ортада) агъалары Тимур ва Расул булан; Арсланбековланы гиччиси Абакар.
