Дагестанские Огни шагьарны ерли администрациясы алдындагъы гюн оьзлени Телеграм-каналында ерлешдирген маълумат Интернетни къоллавчуларыны арасында айрыча сесленивлер тувдургъан. Шагьар гьакимият билдиреген кюйде, бир нече гьакъылбалыкъ болмагъан яшлар Украинадагъы хас асгер гьаракатда жан бергенлени эсделигине оланы ювукъ адамлары орнатгъан тереклени сындыргъан,  бавну айланасына гече ярыкъ береген панарланы бузгъан.

Эсделик бавгъа яш тынчтурмаслар чапгъын этегени биринчи керен тюгюл экен. Тек шондан сонг олар ва оланы ата-аналары булан ким ёлукъгъанны, не къайдалы лакъыр болгъанны, не йимик чаралар гёз алгъа тутулгъанны гьакъында адми-нистрацияны билдиривюнде бир зат да айтылмай.

Амма ерли школаны муаллимин узакъ да къалмай суд жавапгъа тартажагъын эсгермеге унутмагъанлар. Муаллимге къаршы ачылгъан уголовный ишде эсгерилеген кюйде, ол  дарсны юрютме къоймагъан, тынгламайгъан  7-нчи класны охувчусуну билегине чубукъ булан ургъан болгъан.  Яшны ата-анасы шоссагьат аманлыкъны къоруйгъан къурумлагъа арза язгъан ва гьали суд муаллимни 2 йылгъа ерли эркинликден магьрюм этмеге бола.

 

Алав АЛИЕВ.