Артдагъы жыйынланы бирисинде шагьардагъы транспорт ёл гьакъны гётерме сюегенни гьакъында айта туруп, Дагъыстанны Башчысы Сергей Меликов шогъар рази тюгюлюн билдирди. Артдагъы 10 йылны ичинде уьлкени уллу шагьарлары Москвада ва Санкт-Петербургда гётерилмеген багьалар Дагъыстанда неге гётерилегенни гьакъында сорады.
Ол ёл юрюшню гьалыны гьакъында айта туруп, транспортну бир ёрукъгъа салмакъны тапшурду. Алдан берли гелеген пачалыкъ пассажир къурумланы бир ёрукъгъа салма гереклиги ачыкъ болду.
Дагъыстанны Гьукуматыны къарары булан 1736 ва 1 номерли Магьачкъала автоколонналар тайдырылып янгы «Дагестанавтотранс» деген ихтиярлары дазулангъан жамият къурулгъан. Дагъыстанны транспорт ва ёл хозяйство министри Жамболат Салавов билдирген кюйде, «Дагавтотранс» оьзюню ишин 2 айдан башлажакъ. Шагьардагъы гиччи автобусланы иши бир ёрукъгъа салынажакъ, аслу гьалда уллу, заманны талабына жавап береген автобуслар ишлежек.
Сёз ёругъуна гёре айтсакъ, Санкт-Петербургдагъы халкъара экономика форумда юрюлген сёйлешивлеге гёре, КамАЗ Дагъыстангъа бу йыл 64 автобус бережек. Шолар барысы да табиат газ булан ишлейген транспорт.
Г.БЕК.
