Хумторкъали районну Къоркъмаскъала юртундагъы бир номерли школасында тюпденерден ярашдырыв ишлер юрюлюп тура. Гьалиден 50 йыллар алда къурулгъан бу школада, гьали тюгюл, уллу ярашдырыв ишлер болмагъан. Школаны бинасыны ичи-тышы, эшиги-терезеси, полу-пурхасы ярашдырылмаса ярамайгъан даражагъа етишген эди. Ярашдырыв ишлерин юрютеген ишчилер школада охувлар башлангъынча, 15 гюн алда, августну орталарына,  ярашдырыв ишлени тамамламагъа сёз берген.

Район администрацияны башчысыны заместители Бийсолтан Темирханов токъташдырагъан кюйде, бугюнге ерли ярашдырыв ишлени дёрт пайдан  уьч пайы этилип де битген.

Районну башчысы Ай­­­нутдин Зиявутдинов Къоркъмаскъаладагъы бир но­мерли школада  ярашдырыв ишлени ба­рышына багьа берди. Спорт залны ал бетине ва школаны бинасыны ал янына темир тутулуп тура. Школаны ич янындагъы ишлерин этмек учун къурувчулар экиге бёлюнюп ишлей. Биринчи къабатда къурулуш ишлер янгы башланып тура буса, уьчюнчю къатда этилеген тамлагъа сыр сюртюв, тегишлев ва поллагъа лак сюртюв йимик ишлер тамамлана бара.

Къурувчулар отпуск­лардан къайтгъан муал­лимлер де, оьрдеги класланы охувчулары да яш­­лар сентябрни биринде дарсларда олтурсун учун, енгил ишлени этип, къурувчулагъа  кёмек къолун узатар деп умут бар.

«Ярашдырыв ишлени чалт ва алгъасавлукъда этебиз деп айтып, этилеген ишлени сан янына тергев болмай къалма ярамай, — дей районну башчысы А. Зиявутдинов.

Ол айтагъан кюйде, гьар йыл бир школаны уллу ярашдырыв ишлерин этмеге гёз алгъа тутулгъан.  Уллу ярашдырыв ишлеге Темиркъую ва Тёбе школалар гезикде токътагъан.

Жават ЗАКАВОВ

СУРАТДА: Районну башчысы А. Зиявутдинов уллу ярашдырыв ишлер юрюлеген  бир номерли школада.