(«Динамо» Магьачкъала – премьер-лигада!)
Талатгюн, июн айны 18-нде, бизин республиканы тахшагьарыны баш майданында «Динамо» Магьачкъала деген футбол команданы премьер-лигагъа чыкъгъаны булан байлавлу шатлыкълар оьтгерилди. Шо шатлыкъларда Дагъыстанны Башчысы Сергей Меликов да оьзю де ортакъчылыкъ этди.
Шо гьакъда айта туруп, бизин республиканы ёлбашчысы Сергей Меликовну сиптечилиги булан 2021-нчи йылда «Динамо» деген футбол команда янгыртылгъанын айрыча эсгермеге тюше. Демек, бизин республиканы гьакимлик къурумларыны янындан этилеген тергевню ва футбол оюнчуланы къаныгъывлу гьаракаты булан оьзю иш гёреген артдагъы уьч йылны ичинде шо команда премьер-лигагъа оьрленмеге бажаргъан.
Бугюнлерде де футбол савлай дюньягъа яйылгъан, адамланы лап кёп сюеген оюну гьисапда къалып турагъангъа болмагъа ярай, дагъыстанлылар эсгерилген команданы гьаракатына да агьамият бермей тюгюл. Айтагъаныкъ, команда оьтгереген гьар оюнгъа минглер булангъы дагъыстанлылар жыйыла. Бизин республикада да футбол оюнну оьсювюне бакъгъан якъдагъы тергев артдагъы вакътилерде шайлы артгъан. Шо оюн булан янгыз оьрюм чагъындагъы уланлар тюгюл, къызлар да машгъул болуп геле.
Дагъыстанлыланы шо гюнгю шатлыгъына ортакъчы болмакъ учун тышдан да кёп санавда къонакълар гелген эди. Сыйлы къонакъланы арасында Футболну милли лигасыны президенти Наиль Измайлов, «Динамо» деген физкультура-спорт Бютюнроссия жамиятыны председатели Анатолий Гулевский, олай да ону заместители Николай Толстых ва кёп оьзгелери бар эди.
Жыйылгъанланы алдына чыгъып инг алда ДР-ни Башчысы Сергей Меликов сёйледи. Ол оьзюню сёйлевюнде «Динамо» команданы уьстюнлюгю шогъар къуршалгъанланы гьар гюнлюк жанлы гьаракаты, олай да оланы оьзлер машгъул болуп гелеген ишге бакъгъан якъдагъы гьатсыз гьасиретлиги, гьаваслыгъы булан бирге, тувуп оьсген Ватанына сюювюню, ону атын данггъа чыгъармакъ учун къаст этивюню натижасы болуп токътайгъаны гьакъда эсгерди.
Бизин республиканы ёлбашчысыны сёзлерине гёре, оюнчуланы ва тренерлени барышып иш гёрегенлиги команданы гезикли уьстюнлюкге элтген. Олар оьзлени бажарывлугъу ва усталыгъы булан футбол оюнгъа юреги авагъан дагъыстанлылагъа кёпден берли гёзлейген тенгсиз савгъат этгенлер.
Сергей Меликов оьзюню сёйлевюн узата туруп, «Динамо» деген футбол клубну президенти, Россияны ат къазангъан тренери Гьажи Гьажиевни атына да кёп лайыкълы сёзлер айтмагъа къызгъанмады. Шондан къайры да, команданы оюну булан иштагьланагъандагъыстанлылагъа оьзюню разилигин билдирди. Бизин республиканы ёлбашчысыны пикрусун узата туруп, гелген къонакълар да бизин къомандагъа къуршалгъанланы къутлап сёйледи.
Шондан сонг, «Динамо» команданы оюнчуларына, оланы тренерлерине, олай да футбол оюнну бизин республикада оьсювюне этген къошуму гьисапгъа алынып, гьакимлик къурумларыны жаваплы къуллукъчуларына пачалыкъ савгъатлар тапшурулду.
Шо гюнгю шатлыкъгъа жыйылгъанлар ахшам геч болгъунча тозулмай турдулар. Олагъа футбол оюнчулар булан суратлар чыгъармагъа, команда булан байлавлу гиччирек эсделик савгъатланы сатып алмагъа имканлыкъ берилди. Бизин республикада айтылгъан йыравланы, оьзге яратывчу коллективлерини чыгъышлары да жыйылгъанланы къурчун къандырып турду. Шолайлыкъда, премьер-лигагъа чыкъгъан «Динамо» футбол командагъа тийишли гьюрмет этилди.
Насрулла БАЙБОЛАТОВ.
