Роспотребнадзорну Дагъыстан управлениеси Магьачкъаланы администра-циясын судгъа берген.

Тергевчю къурум арзасында эсгереген кюйде, шагьарны гьакимияты бу йылны март айыны ахыры болгъанча «Берёзка» деген пляжда, оьзюнден гече де, гюн де токътамай  агъылагъан нас сувлары булан денгизни похлайгъан  быргъыны  япмагъа герек эди. Тек алышынгъан зат гёрюнмей. Шо саялы Роспотребнадзор салынгъан талапланы яшавгъа чыгъарма алгъасамайгъан ерли муниципалитетни  жавапгъа тартмакъны талап эте.

Тюзюн айтгъанда, судну къарарындан сонг да эсгерилген пляжда тахшагьарны коммунал хозяйствосуну къуллукъчулары гёрюнежек тек тезден берли оьрчюген масъала чечилежек дегенге инанмагъа къыйын. Суд шо быргъыгъа байлавлу гьукму чыгъарагъаны биринчи керен тюгюл. Табиатгъа, айлана якъгъа юз миллион манатлар булан зарал гелтиреген администрация  адатлы гьалда гьар гезик къутсуз 10 минглик къодулар булан къутула.

Яй айлар ювукъ болгъан сайын, Дагъыстангъа гелеген туристлени де санаву артып тербежек. Гьаманда йимик оланы, мисал учун  «Берёзкада»,  уллу такъта гесеклеге залим гьарплар булан: «Киринме ярамай» деген  билдиривлер  къаравуллажакъ. Амма не къонакълар, не ерли адамлар шогъар къулакъасмай. Яллавлу гюнлер салкъын денгиз сувгъа чомулуп леззет алалар. Шо сув буса нечакъыгъа наслангъанын, адамны савлугъуна не йимик зарал гелтирип болагъанын янгыз Роспотребнадзорну касбучулары биле ва алданокъ билдиривлер ерлешдире.

Озокъда, тахшагьарны йыллар булан топлана гелген масъалалары аз тюгюл. Гьакимият шоланы заманда бир чечме де уруна. Тек денгиз тергевсюз къалып тура.

 

Алав  Алиев