Москвада полицейскийлер Табасаран районда турагъан 29 йыллыкъ Хавиер Ярмагьамматовну тутгъанлар.

Жагьил адам шагьардагъы  килисаланы бирисинде хачгъа тюкюрген, ерге ташлап таптагъан. ­ Шо заманда да христианланы атына къычырып эрши сёзлер айта болгъан.

РФ-ни уголовный кодексини 148-нчи статьясына гёре суд ону бир йылгъа эркинликден магьрюм этме яда 300 минг манатны оьлчевюнде къоду салма бола.

Х.Ярмагьамматов башгъа жинаятчылыкъ саялы алда туснакъда туруп чыкъгъан. Ол межитде намаз къылагъанланы бирисини сумкасындан акъчасын урлагъан болгъан.

Дагъыстанлылар булан байлавлу бирдагъы бир агьвалат Къазанда болгъан. Дагъыстандан гелген эки жагьил адам намаз къылабыз деп уллу юк ташыйгъан машинлерин ёлну ортасында къойгъан болгъан ва шону булан оьзге транспортну юрюшюне пуршавлукъ этген. Гьайдавчулагъа полицияны ча­къырмагъа тюшген.

 

Алав Алиев.