Гьар-бир жамиятда татывлу бирикген уьягьлюлер пачалыкъны кюрчюсю де, байлыгъы да болуп токътай. Олай татывлу ожакълар яшёрюмлеге денгиздеги маякълар йимик, шавла берип, тюз ва адилли ёлланы гёрсетелер. Бизин Бабаюрт районда да оьзгелеге уьлгю болуп токътайгъан кёп татывлу агьлюлер бар.
Шолай агьлюлени ал сыдраларына Гьасанай юртда яшайгъан Салимхановланы агьлюсюн де къошмагъа толу ихтиярыбыз бар.
Нурутдин ва Асият Салимхановлар юртлуларыны арасында тезден абур да, сый да къазангъан. Олар сав оьмюрюн загьмат булан байлап, татывлу ва берекетли ожакъ къуруп, агьлюде адилли авлетлер оьсдюрген ва тарбиялагъан.
Агьлюню башы Нурутдин Юсупович 1956-нчи йылда Гьасанай юртда тувгъан. Ата юртундагъы школада охуп, документлерин Магьачкъала шагьардагъы гидромелиоративный техникумгъа бере. 1979-нчу йылда шону уьстюнлю кюйде битдирип, касбу ёлун Пенза шагьардагъы «Пензамелио-водстрой» деген къурумда башлай.
1981-нчи йылда Нурутдин йыракъ эллерден ата юртуна къайтып, о замангъы «Дагъыстан» деген совхозда мелиоратор болуп ишин узата. 1992-нчи йылларда Нурутдин «Гьасанай» деген колхозда да ишлеген. Колхозлар тозулгъанда ГУЭОС «Гьасанай» деген идарада ишлей.
1979-нчу йылда Нурутдин оьзю кёп сюеген Асият деген юртлу къыз булан уьйленип, татывлу ожакъ къургъан. Агьлюде 4 авлет тувгъан: бир улан ва уьч къыз.
Нурутдин Юсуповични яшав ёлдашы Асият Муратбековна да уьйде олтуруп турмагъан. Кёп яшлы ананы къуллукълары булан янаша жамиятгъа ва пачалыкъгъа пайдалы ишни юрюте. Дейгеним, бир де загьматдан къачмагъан. Колхозда гьар тюрлю тапшурувланны да кютген, бир заманны ичинде яшлар бавда да ишлеген.
Муна 44 йылланы боюнда Нурутдин ва Асият биринден бири сююнюп, бал да къашыкъ да йимик болуп яшай десек кёп къопдурув болмас. Ат туягъы тай басар деп, оланы биргине бир уланы Закир, атасындан уьлгю алып, мелиоратор касбуну танглагъан. Оьр билимлеге ес болуп, атасыны ёлуна тюшген.
Бугюнлерде Закир «Минмелиоводхоз»деген идараны «Гьасанай» филиалында загьмат тёге. Булай татывлу агьлюде тувгъан ва тарбиялангъан уьч де къызы да, билимлер де алып, гьариси загьматы булан яшавда оьз ерин тапгъан. Къызланы уллусу Фарида ва лап гиччиси Эльмира юреги авуп , муаллим касбуланы танглагъанлар. Фарида бугюнлерде Хасавюрт шагьардагъы 12 номерли школада къумукъ тилден ва адабиятдан дарс бере.Эльмира буса Хамаматюртдагъы школада тарих дарсланы муаллими болуп белсенип чалыша. Къызланы ортанчысы Зиярат агьлюсю булан йыракъ Тюмен бойлагьа чыгъып, онда яшай ва ишлей.
Бизин ата-бабаларыбызны уясында не гёрсе, учгъанда шону этер деген алтын сёзлери бар. Салимхановланы берекетли ожагъында оьсген яшлар, бугюнлерде халкъ арада адилли ишлери булан белгили. Неге тюгюл, оланы гёз алдында ата-ананы, ким де сукъланардай, яшаву-турушу болгъан.
Ата-ана яшларын мелте чагъындан башлап, бир-бирине бавурлу болмагъа, загьматдан къачмайгъан, билимлер алмагъа муштарлы кюйде тарбияламагъа къасткъылгъан. Аталардан гелген асил милли адатланы ва мердешлени сакъламагъа, уллулагъа гьюрмет этип, гиччилеге гьайлы янашмагъа уьйретген. Салимхановланы авлетлери ата-анасындан уьлгю алып, оьзлер де тизив татывлу ожакълар къургъанлар. Бары да зат агьлюден баш алагъанны Салимхановлар яхшы англай. Бугюнлерде Нурутдин ва Асият чагъы гелип, пенсияда ял алалар. Уллата ва уллана торунларындан сююне ва къувана. Баланы баласы балдан татли дегенлей, оланы авлетлерини он авлети бар. Олар барыда яй айларда абзаргъа жыйылгъанда, Салимхановланы ожагъы яшланы шат кюлкюсюнден ва авазындан толуп къала.
Шондан уллу насип бармы?! Нурутдин ва Асият сав оьмюрюн загьмат булан къурсада, яшланы тюз тарбиялавуна уллу агьамият ва даража бергенлер. Бу эки де адамны бир — бирине бакъгъан янашавуна къарап гьайран боласан .
Гертиден де, олар узакъ йылланы боюнда сюювню, адилликни, гьюрметни, берекетни агьлюде сакълап болгъан. Салимхановланы агьлюсюне бири биринден сююнюп дагъы да узакъ йыллар яшамакъны ёрап, берекетли, татывлу ва рагьмулу ожакъ къуруп, авлетлерин тизив ва тюз кюйде тарбиялагъан саялы баракалла билдиребиз. Озокъда, яшавда къатты савлукъ, насип, шатлы ва сююнч гюнлени арты узюлмесин деп айтмагъа сюебиз.
Бэлла ГЬАЖИГЕЛДИЕВА,
