ДР-ни туризм ва халкъ саниятларыны министерлигини прес-къуллугъу билдиреген кюйде, Дагъыстангъа къонакълай гелеген туристлени санаву арт вакътилерде йылда 40 процентлеге артып тура. Республикабызда артып тербейген талапланы гьисапгъа алып некъадар тийишли къуллукълар яратылына деген сорав тувулуна. Неге десегиз, туристлер ял алмагъа ва савлугъун беклешдирмеге, билимлерин камиллешдирмеге онгайлы къуллукълар бар ерлени ахтарагъаны ва танглайгъаны ачыкъ болуп гёрюне.
– Бизин уьлкебизде артдагъы йылларда ич туризмни оьсдюрювде пачалыкъны кёмеклешивюн ва шолай да маячыланы харжларын пайдаландырыв ёрукълаша геле, – дей Ставрополь шагьарда ерлешген Темиркъазыкъ-Кавказ федерал унисверситетини туризмни ва къонакъланы къаршылавну масъалалары булан машгъул болагъан кафедрасыны заведующийи Татьяна Кулаговская. – Тек не этерсен, Дагъыстанда савлай СКФО-да йимик, гьалиге ерли туристлер учун тийишли къуллукъланы болдурувда, айрокъда официантлар ва уьй къуллукъчулар етишмейгени ойлашдыра. Экономикасы оьсген, яшаву алгъа гетген пачалыкъларда йимик бизде де туристлени артып барагъан талапларын тергевсюз къойма тюшмей. Айтагъаныкъ, тийишли къуллукъланы болдурув булан дазуланмайлы, онгайлыкъланы даражасын артдырыв бугюнню аслу масъаласы болуп токътагъан. Бизин университетде де шогъар айрыча агьамият бериле ва 13 факультетде агьамиятлы тармакъ учун гьар тюрлю касбучулар гьазирлене.
Эсгерилген охув ожакъны охуп чыкъгъанланы гележекдеги къысматына байлавлу яш касбучулар булан байлавлукълар уьзюлмей ахтарывлар оьтгерилегени гьакъда айрыча эсгермеге тюше. Туризмни оьсдюрювге Дагъыстан да, оьзге ерлер булан тенглешдиргенде, бар имканлыкълардан артда къалмай. Имканлыкъланы асувлу кюйде къолламагъа неге бажарылмай?
Белгили болгъаны йимик, табиат байлыкълары, къонакъланы исси кюйде къаршылайгъан адамлары булан танывлу республикабызда ата-аналары къызларына туризм тармакъда тарыкълы къуллукълар учун, СКФО-ну оьзге регионларында йимик, уьй къуллукъчулар, официантлар болуп ишлемеге изну бермей. Шо да туризм индустрияны тийишли къуллукълар булан таъмин этивню масъаласына, даражасын артдырывгъа четимликлер тувдура.
Къ. КЪАРАЕВ.
