Россия узакъ асруланы боюнда юзлер, минглер булангъы дослукъда яшайгъан миллетлени бирлешдиреген, оланы оьтесиз бай маданият ва ругь варислигине гьюрмет этилип гелеген эл гьисаплана. Бизин уьлкеде яшайгъан гьар миллетни токъташгъан мердешлерине гёре оьзю белгилейген байрамлары оьтесиз кёп. Оланы бир элни халкъы гьисапда барысын да бирлешдиреген байрамлар да бизин уьлкени яшавунда агьамиятлы ер тута.
Шоланы арасында 2005-нчи йылдан берли Халкъланы бирлигини гюню уьлкебизни асрулар боюнда парахатлыкъда ва ярашывлукъда яшап гелген миллетлерини ортакъ къысматыны бир белгиси болуп токътай.
Шо гюн 1612-нчи йыл Кузьма Мининни ва Дмитрий Пожарскийни ёлбашчылыгъы булан Москвада халкъ гётерилип, Польшаны елевчю армиясына къаршы тургъан. Шо ябушувда уьстюнлюк де къазангъан.
Артындагъы йыл Москвада янгы орус пача белгиленген. Романовланы тухумундан гьисапланагъан Михаил Фёдорович тахгъа олтургъан. 1618-нчи йыл Россия бютюнлей швед ва поляк асгерлеринден толу кюйде азат этилген.
Оьрде эсгерилген агьвалатлар гёз алгъа тутулуп, 4-нчю ноябр Халкъланы бирлигини гюню деп токъташдырмакъны гьакъында 2004-нчю йылны декабр айыны 29-нда Россияны Президенти Владимир Путин Указгъа къол салгъан. Шондан сонг буса 2005-нчи йылны июль айыны 21-нде чыкъгъан федерал законгъа гёре, 1918-нчи йылдан берли, 73 йылны боюнда Уллу Октябр социалист революцияны гюню деп белгиленип тургъан 7-нчи ноябр Эсделик тархны гюню гьисапда токъташдырылгъан. Демек, шо гюн 1917-нчи йылдагъы Октябр революцияны гюню деп белгилене. Буссагьатгъы вакътиде 7-нчи ноябр Россияны асгер макътавлугъуну гюню деп де, 1941-нчи йыл, Октябр революцияны гьюрметине оьтгерилген асгер парадны гюню деп де санала.
Ачыкълашдырып айтгъанда, адилли, харлысыз пачалыкъда, элибизни тарихине тийишли даражада агьамият берип, маданият варисликни асырап сакъламакъ учун, уьлкени халкъларыны арасындагъы дослукъну беклешдирмек шо байрамны алдына салынгъан аслу борчлардан гьисаплана. Бир де къопдурувсуз айтгъанда чы, о тарихи эсибизни уятагъан агьамиятлы байрамдыр.
Халкъланы бирлигини гюнюне байлавлу байрам шатлыкълар Россияны тахшагьары Москвада йимик, оьзге регионларда да оьтгериле.
Н. БАЙБОЛАТОВ.
