Тарбия ожакъда башлана буса да, тарбиялавчуланы гиччипавланы яшавундагъы ролю агьамиятлы ва къыйматлы экенлигине бирев де шеклик этмейдир деп эсиме геле. Озокъда, кёп тюрлю байрамлар йимик, яшланы тарбиялавчуларыны ва яшлар бавларыны къуллукъчуларыны да гюню белгиленген.
Гьар йыл Россия Федерацияда сентябр айны 27-нде тарбиялавчуланы гюню оьтгериле. Бизин пачалыкъда яшланы тарбиялавчуларыны гюню 2004-нчю йылда белгиленмеге башлагъан. 1963-нчю йылда сентябр айны 27-нде Санкт-Петербург шагьарда биринчи яшлар баву да ачылгъан болгъан.
Тарбиялавчуланы гюнюн оьтгермекни де сиптечилери – ватандашлар, айрокъда ата-аналар. Неге тюгюл де, гиччипавлар тарбиялавда биринчи абатларын яшлар бавларында тарбиялавчуланы ёлбашчылыгъы булан ала. Сав гюн гиччипавланы гьарисини юрегине ёл табып, гьар тюрлю оюнлар, яратывчулукъ ишлер булан машгъул этмеге, ашавун, юхусун тергевню тюбюнде сакъламагъа тынч тюгюл. Яшлар бавларында яшланы, англайгъан, гьакъ юрекден сюеген, инче ва назик юрекли, бир заманны ичинде талаплы ва низамлы адамлар болмаса, ишлеп де болмайдыр.
Алапаланы азлыгъына, ишини къыйынлыгъына да къарамайлы, кёп йылланы боюнда яшлар бавунда чалышагъан абурлу, сынавлу тарбия-лавчулар нечакъы да бар. Олар яшлагъа, яшлар да олагъа шонча да уьйренген. Гьар гюн эртен ва ахшам яшлар бавуна барагъан яшлар сююмлю тарбиялавчуларын инг ювукъ адамларыдай гьисап эте, къучакълап, оьзлени сюювюн исбат эте. Школа чагъына етишип яшлар бавундан чыкъгъан сонг да яшлар тарбиялавчуларын унутмай эсгере, гёрмеге бармагъа гьасирет бола.
Озокъда, яшланы тарбиялавчуларыны ва яшлар бавланы къуллукъчуларыны гюню белгиленегени нечакъы да яхшы ва тийишли де дюр. Тек Дагъыстан Республикада яшлар бавларында масъалалар ёкъ тюгюл. Билим берив тармакъда школаларда йимик, яшлар бавларында гьар бёлюкде яшланы санаву нормадан артыкълыгъы тарбиялавчуларыны ишине четимликлер тувдура. Шогъар да къарамайлы, тарбиялавчулар гьар яшны юрегине ёл тапмагъа, тийишли тергев этмеге, яшлар бавну программасына гёре тарбиялав ва билим берив чараланы оьтгерме къаст эте ва бажара.
Гьар байрамгъа гиччипавлар булан гьазирлеген бийивлеге, сагьна гёрюнюшлеге къарап, олар йырлагъан йырлагъа, гёнгюнден охуйгъан шиърулагъа тынглагъанда, тамаша боласан. Бу чараланы барысын да ата-анадан кёмексиз тарбиялавчулар оьтгере. Тарбиялавчулар янгыз оьзлени касбусун тюгюл, йыравну да, артистни де пагьмуларын бирикдирип бажара.
Муна бугюнлерде де тарбиялавчулар гиччипавланы байрам чаралагъа гьазир этивню гьайындадыр. Гиччипавлар тарбиялавчуларына багъышлан-гъан йырлар йырлажакъ, шиърулар охужакъ, бийивлер ва сагьна гё-рюнюшлер гёрсетежек. Олар да яшлар булан бирче леззет алажакъ.
Тарбиялавчуланы ва яшлар бавларыны бары да къуллукъчуларын касбу байрамы булан мен де гьакъ юрекден къутламагъа сюемен. Ишинде ва яшавунда уьстюнлюклер, савлукъ, насип ва парахатлыкъ ёрайман.
Патимат БЕКЕЕВА,
