Дагъыстанны Ич ишлер министерлигини маълумат бёлюгю билдирегенге гёре, республикада гьакъылбалыкъ болмагъан яшланы арасында жинаятчылыкъ артып тербей. Шону артдагъы агьвалатлар да гертилей. Гьарисине байлавлу Интернетдеги сесленивлеге къарагъанда, гьаманда йимик гюнагьлы яшланы ата-аналары бары да айыпны школалагъа салма къарайлар, сайки, педагоглар оьзлени борчларын тийишли кюйде кютмей. Муаллимлер буса, оьз янындан олагъа тарбия инг алдын агьлюден башланагъанын эсине сала.
Сентябр айны 22-нде гече сагьат 9 битип, Агъачавулда, (Къарабудагъгент район) къызыл тюсдеги «Жигули» артгъа берип, ёлдан велосипедге де минип оьтюп барагъан 7 йыллыкъ уланъяшны токътатма къарай. Уланпав бир къутула, эки къутула, тек ахырда машин ону ягъадагъы чырлагъа уруп къыса. Сан-саны авуртгъан яш велосипедин къоюп, ёлну ортасына чыгъып йылама башлай. Машинден 15 йыллыкъ гьайдавчусу ва ону къырыйында болгъан 14 йыллыкъ зукъариси чыгъып, гиччипавгъа бир затлар сёйлей. Балики огъар кёмек тарыкъдыр деген ой элбезгенлени башына да гелмеген, машинине де минип, гьайдап гетгенлер.
Яхшы чы шо ерде видеокамералар болгъан, шо саялы гьали не ялгъанлар айта турса да, законну алдында жавап бермеге тюшежек. Полицейскийлер тергевлени башлагъан.
Арадан эки гюн оьтюп, Дагестанские Огни деген шагьарда гюндюз вакъти яшлар ерли спорт майданчаланы бирисинде футбол ойнай болгъан. Оюнну вакътисинде 15 йыллыкъ уланъяш оьзюнден эки йылгъа гиччи яшгъа бетине юмуругъу булан уруп авур яралагъан. Россияны Ахтарыв комитетини Дагъыстан ахтарыв управлениеси уголовный иш ачгъан. РФ-ни Уголовный кодексине гёре, айыплы яшёрюмню суд 8 йылгъа ерли эркинликден магьрюм этмеге бола.
Артындагъы гюн Избербашда 18 йыллыкъ уланпав оьтюп барагъан машинден таба шагьардагъы килисаны къапуларына бир нече керен тапанча булан атышгъан. Тутулгъан сонг: «Негер этген эдинг?» деген соравгъа адамшавлу жавап берип болмагъан.
