Дагъыстанны Башчысы Сергей Меликов булан 27-нчи февральда ТАСС агентлигинде прес-концеренция оьтгерилди. Шонда Сергей Алимович республикада яшавгъа чыгъарылагъан аслу милли проектлени, инвестиция этилеген тармакъланы, туристлени тийишли кюйде къаршыламакъ учун юрюлеген ишлени, хас асгер гьаракатны ортакъчыларыны агьлюлерин якълавну ва республиканы оьсювю гьакъда толу кюйде хабарлады.

 

Къурулушланы гьакъында айта туруп, ол гьали алдан берли юрюлюп тургъан башалманлыкъ токътатылгъанын айтды. Ихтиярсыз къурулгъан мюлклер тайдырылажакъны ва не ерлерде яшавлукъ учун тарыкълы идаралар да булан генглешип яшама планлар къурулгъанны гьакъында да толу кюйде хабарлады. Шолай да, «Чиркей – Магьачкъала – Каспийск» сув быргъы ишлеме башлагъан­ны ва гележекде Каспий денгизге тёгюлеген насланы тазаламакъ учун хас имаратлар ишленежекни де айтды.

Ону сёзлерине гёре, Россияны Президентини «газ­лашдырывгъа» багъышлангъан тапшуруву уьстюнлю кюйде кютюле, электрик хозяйствону ярашдырмакъ учун аслам акъчалар берилген, шо ишлер толу кюйде 2027-нчи йылда тамамланажакъ. Школалар ва яшлар бавлар къурувдан республика да аслам ишлер юрюле.

Артдагъы йылларда Дагъыстан туристлени кёп тартагъан регион болуп тура, шону учун да къонакъланы тергевюн тартагъан ва толу кюйде ял алагъан кюйдеги имканлыкълар болдурулажакъ. Аэропортну ва ёлланы гьалы яхшылаша.

Спортну гьакъында айта туруп, тутушуп ябушувдан Дагъыстан дюньяда биринчи ерни алагъанны, яшлар гиччи чагъындан тутуп футбол оюнгъа къуршалагъан­ны, республикада Палестинадан гелгенлени сыйындыргъанны, ана тиллени сакълавда этилеген ишлени гьакъында да лакъыр­ болду.

Сергей Меликов лакъырны жамын чыгъара туруп, эсгерилген ишлер толу кюйде яшавгъа чыгъажакъгъа инанагъанын айтды, неге тюгюл де шоланы кютюв дагъыстанлылагъа тапшурулгъан. Олар ана элин кёп сюеген адамлар. Юрекде элине бакъгъан сююв бар буса, ишлер де ва  яшавлукъ гьаллар да яхшылашажакъгъа инамлыкъ да арта.

 

Бизин мухбирибиз.