Магьачкъалада «Шагьар – бизинки» деген жамият къурум иш гёрегенли 7 йылдан да артыкъ бола. Белгили кюйде, 2016-нчы йылда шагьар гьакимият Магьачкъаланы паркларыны бирисинде хыйлы тереклени де гесип, къырып уллу музей къурма муратлы эди. Амма оьзлер турагъан ерни гележеги учун жаны авруйгъанлар жыйылып, бирлешип, жамият гьаракат гьисапда арагъа чыкъгъанлар ва паркны бузувдан къоруп бажаргъанлар.
Тек оланы гьакимият булангъы «тогъатартывлары» бугюн де токъталмай. Февраль айны ахырларында администрацияны сайтында шагьарны Элтав орманлыгъында ва Акъ-кёлню ягъаларында кёп къабатлы уьйлер къурмакъ учун ижарагъа ерлер бериле деп билдирив ерлешдирилген эди. Алдан берли юрюлеген Магьачкъаланы гьар бош къарышын елемек, сатмакъ деген терс мердеш, шагьарны башчылары алышына турса да, къарагъанда теренден тамур яйгъандай, гьали де оьмюр сюрегенге ошай.
Жамиятчылар Элтавну ва Акъ-кёлню масъаласын гётерип, шагьарны башчылары булан бир-нече керен ёлукъгъанлар, тек оьзлеге ончакъы къулакъасма сюймейгенин англагъанда, сайлавланы гюнюнде Ленинни майданына хыйлы халкъны жыяжакъбыз деп айтгъан. Шо заман администрацияны сайтындан Элтавгъа ва кёлге байлавлу билдиривлер тайдырылгъан.
Узакъгъамы? Шону билмеймен.
Алав АЛИЕВ
