Дагъыстанны Оьр судунда алда аманлыкъны къоруйгъан къурумларында къуллукъ этген гьали пенсиягъа чыкъгъан Д.Велагаевни уголовный ишине къаралгъан.
Судгъа бакъдырылгъан материаллагъа гёре, Д.Велагаев 2019-нчу йылны февраль айыны 5-нде Магьачкъалада оьзюнден айрылгъан къатынын оьлтюрген болгъан. Олар бир-бири булан 17 йыл бирче яшагъан, тек къатынгиши эрини бирдагъы агьлюсю бар экенни билгенде, аралыкъланы токътатгъан.
Шо гюн Д.Велагаев къурдашыны юбилейин белгилей болгъан. Шайлы эсирген сонг, гече сагьат 3-де алдагъы къатынын гёрме баргъан. Ёлугъувну вакътисинде къатынгиши ондан уланын коллежге охума салмакъ учун акъча тилеген. Эри ончакъы акъчам ёкъ дегенде арасында эришив башлангъан. Сёзден сёз чыгъып дегенлей, бек ачувлангъан эргиши къатынны башына янындагъы тапанча булан бир нече керен уруп, сонг бувуп оьлтюрген.
Къатынгишини арадан 12 гюн оьтюп хоншулары тапгъан. Квартиринден яман йиис гелегенине чыдап болмай, эшиклерин бузуп ачгъанлар, къатынгиши халиге чырмалгъан болгъан.
2020-нчы йылны март айында Магьачкъаладагъы Совет район суд Д.Велагаевни алдагъы къатынын оьлтюрген саялы шарт булан 2 йылгъа эркинликден магьрюм этмек деген къарар чыгъаргъан. Сёз ёругъунда айтгъанда, тезде шо судда ону атасы ишлеген.
Оьр суд район судну къарарын гючде къойгъан.
Алав АЛИЕВ.
