Микайыл Абуков тувгъанлы 95 йыл битегенликге
Микайыл Абуков Хасавюрт районну Темиравул юртунда 1929-нчу йылда тувгъан. Мелиораторлар гьазирлейген техникумну битдирген сонг, ата юртундагъы колхозда ишлеген. Яратывчулукъ ёлун проза тармакъда башлагъан. Москвада М.Горькийни атындагъы адабият институтну битдирген. Хыйлы йыллар «Ленин ёлу» газетде ишлеген. Артдагъы йыллар Дагъыстанны кинофикация управлениесинде чалышгъан.
Ону биринчи хабарлары ва очерклери «Ленин ёлу» газетде, «Дослукъ» деген альманахда чыгъып тургъан. «Сёйлей Темиравул» деген биринчи китабы 1957-нчи йыл басмадан чыкъгъан. Сонггъу йылларда ону хабарлары булан бирче очерклери де топлангъан «Боран», «Мени юртлуларым» деген атлар булан китаплары охувчулагъа етишген. Сатира ва юмор булангъы новеллалары «Борч къайтарыш булан яхшы», «100 манатлыкъ масхара» деген атлар булан чыкъгъан. Язывчу юртларда болуп турагъан маданият янгылыкъланы ва бу тармакъда ишлейгенлени гьакъында «Къыйматлы таш» деген повестинде язгъан.
Микайыл Абуков 1963-нчю йылдан берли СССР-ни язывчуларыны союзуну члени. Охувчулар ону «Яшавну ахыры ёкъ», «Рагьмулу тюбек», «Аслу тапшурув», «Душман бир гьилла къура» деген атлар булан чыкъгъан китапларын да разилик булан къабул этген. Язывчубуз тувгъанлы 95 йыл битегенликге байлавлу болуп «Йыгъылгъанны ер гётерер» деген китабындан бир гесекни ва яшлар учун язылгъан къысгъа хабарын охувчуланы тергевюне беребиз.
Яраш БИЙДУЛЛАЕВ.
