Сынав асувлу пайдаландырыла

Хумторкъали районну администрациясыны башчысы Айнутдин Зиявутдинов гьар жумада бола­гъан жыйында «Гиччи Ватан – Россияны гючю» деген форумда ортакъчылыкъ этгени гьакъда хабарлады. Шонда алдынлы экспертлер, федерал министерлери булан лакъыр этмеге, гьар тюрлю тармакълардагъы ахырынчы янгылыкъланы арагъа салып ойлашмагъа  имканлыкъ болгъан. 

 

–  «Гиччи Ватан – Россияны гючю» деген муниципал форумда уьлкени тюрлю регионларындан гелген айтылгъан касбучулар булан таныш болмагъа, сынав алышдырмагъа, масъалаланы чечивню ёлларын ахтармагъа бола эдик. Ерлерде къуллукъланы оьсювюне, милли проектлеге, шолагъа кюрчюленип билим беривню ва спортну сиптечилигин оьсдюрювге, шолай да, юртларда яшамагъа онгайлыкъланы болдурувгъа кёп тергев бердик, – деди А. Зиявутдинов.

Муниципал къуллукъчуланы баш борчу оьз Ватаныны талайы учун гьукуматгъа ва жамиятгъа къуллукъ этмек, шону учун да, ватандашланы яшавун онгайлы этмеге, адамлагъа тынгламакъ ва оланы эшитмек бек агьамиятлы.

А.Зиявутдинов Россияны­ Игити Залибек Умаев булан ёлукъгъаны ва узакъ заман лакъыр этгени гьакъда да айтды.

– Хас асгер гьаракатда  болгъан офицер булан этген  лакъырынгны вакътисинде герти гьалны билесен. Залибек янгыз Украина бойда юрюлюп турагъан хас асгер гьаракатны гьакъында айтып къоймады, шонда дав этип турагъан солдатланы агьлюлерини гьайын этмеге гереги гьакъда да хабарлады. Асгер къуллукъчу оьзюню агьлюсюню гьайы этилегенни билсе, къоркъмай-тартынмай душман булан бетге-бет туруп дав этежеги белгили. Юреги парахат болмаса, солдатгъа дав этмеге къы­йын.  Хумторкъали районну вакиллери асгер къуллугъун парахат юрютмеге бола, неге тюгюл де оланы агьлюлерини гьайы этиле, – деди  А. Зиявутдинов.

Форумда алгъан сынав гёзден гечирилежек ва Хумторкъали район учун пайдаландырылажакъ.

 

Жават ЗАКАВОВ

Авторизация
*
*
Регистрация
*
*
*
Согласны с условиями сайта?
Генерация пароля