Оьтген къаттыюн, октябр айны 22-синде, Къарабудагъгент юрт­ну жумамежитинде Сыйлы Къуранны охувгъа ва Ону гёнгюнден уьйренивню агьамиятлыгъына байлавлу районара форуму оьтгерилди. Солтанмутну атындагъы рагьмулукъ фондуну ва Межитлени янында иш гёреген мадрасаланы  ассоциациясыны сиптечилиги булан юрюлген шо гьаракатда Къарабудагъгент ва Къаягент районланы юртларындан гелген мадрасаларда  дарслар юрютеген мударрислерден къайры да, жумамежитлерини имамлары да ортакъчылыкъ этди.   

 

Оьзюню ишинде, умуми кюйде алгъанда, 200-ден де артыкъ адам ортакъчылыкъ этген  шо гьаракат Сыйлы Къуранны аятларын охув булан башланды.  Шондан сонг, Магьачкъала шагьардагъы «Ихлас» деген межитини имамы Рагьмутдин Бадрутдинов, Межитлени янында иш гёреген мадрасаланы ассоциациясыны ёлбашчысы, Янгы Паравул юртну имамыны заместители Къазали Къазанлиев, Манасгент юртдагъы мадрасаны ёлбашчысы Исрапил Гьажиев ва кёп оьзгелер чыгъып сёйледилер.

Олар биринден-бири алып дегенлей, Сыйлы Къуранны уьйренмекни  агьамиятлыгъы гьакъында айтды. Шону булан бирге, оьзлени сынавуна асасланып, Сыйлы Къуранны гёнгюнден уьйренеген гьапислени гьазирлевде пайдалы болар йимик асувлу къайдаланы малим этди. Белгили дин алими Абдулла-гьажи Хидирбеков да оьзюню сёйлевюнде Сыйлы Къуранны гёнгюнден  уьйренивню маънасы гьакъында эсгерди.

Оьтгерилген форумну барышында эл ахтарывчу Осман Ражаповну сёйлевю де маъналы болуп чыкъды. Ол Къарабудагъгент юртну тарихи гьакъда айта туруп, 100 йыллыкъ рузнаманы тизген шайых Давут-гьажи ислам динге не къадар къуллукъ этгенин ачыкъ этип хабарлады. Къарабудагъгентдеги гимназияны 7-нчи класыны охувчусу Юсуп Гьажиев Сыйлы Къурангъа абур этивге байлавлу язылгъан назмуну охуп алды.    Оьзюню гезигинде Къарабудагъгент юртну имамы Халит-гьажи Бабатов торайып гелеген яш нас­луну ругь-къылыкъ якъдан тарбиялавда таъсирли гьаракатны оьтгермеге Къарабудагъгент юртну танглагъаны учун ону сиптечилерине разилигин билдирди.

Шо гьакъда айта туруп, оьтгерилген гьаракатны барышында сёйлевлени аралашдырып гьапислер Сыйлы Къуранны аятларын гёнгюнден охугъанын да айрыча эсгермеге тюше. Шондан къайры да, лап ахырда  мадрасаларда дарс берегенлени арасында Умра гьаж къылмагъа тегин бармагъа ихтияр береген путёвканы есиси белгили этилди. Къарабудагъгент юртда иш гёреген «Берекет» деген рагьмулукъ фондуна къуршалгъан жагьил уланлар шо гьаракатны къурумлу оьтгеривге гёнгюллю кюйде болушлукъ этип турдулар.

 

Насрулла БАЙБОЛАТОВ.