Дагъыстанны Гьукуматыны тармакъ министерликлери артдагъы йылларда 50-ге ювукъ гьар тюрлю федерал оьлчевдеги пачалыкъ программаларда ортакъчылыкъ эте. «Юрт хозяйствону асувлулугъу учун» деген милли борчну яшавгъа чыгъармакъ учун юрюлеген гьаракат баргъан сайын гючлене. Къоллавчуланы артып тербейген талапларын якълап сурсат аманлыгъын болдурувну масъаласы да аслу хат булан эсгериле.

– Гьалиги заманда республикабызны агропромышленный комплексинде уьч пачалыкъ программа яшавгъа чыгъа­рыла, – дей ДР-ни юрт хозяйство ва сурсат министрини заместители Эмин Шейхгьасанов. – «Юрт хозяйствону оьсювю ва къоллавчуланы сурсат маллар сатылагъан базарларыны ишин ёрукълашдырыв», «Юрт хозяйство агьамияты булангъы топуракъланы асувлу кюйде къоллав ва сугъарылагъан майданланы къолайлашдырыв», «Юрт ерлени комплекс къайдада оьсювюн болдурув» – барысы да пачалыкъны ва халкъны пайдаларын якълап, сурсат аманлыгъын болдурувгъа бакъдырылгъан программалар гьисапда белгили.

Юрт хозяйство топуракъланы асувлу кюйде къоллав – юрт ерлердеги ишсизликни алдын алмагъа, ерли ва регион бюджетлени налог жыйымларын толумлашдырмагъа кёмеклеше. Дагъыстанны Башчысы Сергей Меликов да эсгерилген пачалыкъ программаланы яшавгъа чыгъармакъ учун юрюлеген гьаракатыны натижаларына айрыча тергевюн бакъдыра.

Бугюнлерде ДР-ни Гьукуматыны Председателини заместители Нариман Абдулмуталибовну ва юрт хозяйство министри Мухтарбий Ажековну арасында болгъан ёлу­гъувда да пачалыкъ прог­раммалар учун гёрсетген акъча маяланы асувлу кюйде къолламагъа тюшегени гьакъда айрыча сёз юрюлдю. Федерал бюджетден 2023-нчю йылгъа агропромышленный тармакъны асувлулугъун артдырмакъ муратда 2.5 миллиард манат акъча маялар бакъдырылгъан. Шо да оьтген йыл булан тенглешдиргенде 500 миллион манатгъа къолай бола.

Муна шо саялы да, пачалыкъ программаланы оьлчевюнде гёрсетилинген акъча маяланы юрт хозяйство малланы оьсдюрюв булан машгъул болагъан предприятиелеге, кооперативлеге, акционер жамитлагъа ва сабанчы-фермер агьлюлеге етишдирив булан дазуланып къалмагъа тюшмей. Оьсдюрюлеген юрт хозяйство малланы ишлетеген, сакълавгъа салагъан ва сатывгъа чыгъарагъан логистика центрланы къурувгъа да тергевлю кюйде янашмасакъ, болма имканлы тас этивлени алдын алыв четимлеше. Юрт хозяйство малланы оьсдюрегенлер учун тийишли онгайлы къуллукълар яратылмаса, сатывдагъы багьаланы артагъаныны алдын алмагъа къыйын болажакъ.