Савлай уьлкеде язбашгъы каникулланы вакътисинде яшлар учун язылгъан китапланы жумалыгъы оьтгерилегени кёп йылланы узагъында мердешге айлангъан. Яшланы китапханалагъа гелмеге муштарлы, охувгъа иштагьлы этмек муратда юрюлеген шо гьаракатгъа бизин республикада да артыкъ агьамият бериле. Къарабудагъгент районну юрт китапханаларында да гьар гезик шо гьаракат айрыча таъсирли бола.

 

Ачыкълашдырып айтгъанда, бу йыл Агьлюню йылы гьисапда белгиленгени гёз алгъа тутулуп, «Агьлю охуй – охуй уьлке» деген чакъырывгъа гёре юрюлдю. Эсгерилген жумалыкъны ачылывуна байлавлу гьаракатны вакътисинде инг алда шону юрютеген охувчу къызлар Иравзат Ильясова ва Саламат Гьажиева жумалыкъны гьакъында айтдылар. Шондан сонг бу йыл оьзлени юбилей тархлары белгиленеген шаирлер Вагьит Атаевни, Зулейха Атагишиеваны, олай да Насрулла Байболатовну  яратывчулугъу гёзден гечирилип, олар яшлар учун яратгъан асарлагъа айрыча тергев берилди. Къарабудагъгентдеги уьч, беш номерли ва Къакъашурадагъы, Гьелидеги орта школаларда билим алагъан яшлар, биринден-бири алып дегенлей оланы шиъруларын гёнгюнден охуду. Къарабудагъгентгеги гимназияны, эки номерли орта школасыны,  школа интернатны охувчуларыны, олай да «Золушка» деген  яшлар бавуна юрюйген гиччипавланы чыгъышларын да жыйылгъан яшлар кёп сююп къабул этди.

Оьзюню гезигинде яшлар булан ёлугъувгъа чакъырылып гелген  шаир, «Къарчыгъа» журналны жаваплы редактору Нас­рулла Байболатов бугюнлерде басмагъа берилген янгы китабына гирген бир нече шиърусун охуду. Шону булан бирге, яшлагъа билимлени битмейген хазнасы гьисапда къалып тура­гъан китап булан герти къурдаш болуп турмакъны ёрады. Ону пикрусун узата туруп, Къарабудагъгент районну китапханасыны ёлбашчысы Аминат Сотаева, «Алдынлыланы гьаракаты» деген бирлешивюню яшлар  булан иш юрютеген касбучусу Райсанат Унаева да  жыйылгъанланы къутлап сёйледи. Оланы рагьмулу, тарбиялы болмагъа, китапны хадирин билмеге чакъырды. Жумалыкъны ачылывунда жагь кюйде ортакъчылыкъ этген яшлагъа гьюрметлев грамоталар  булан бирче гиччилеге чыгъарылгъан  къужурлу китаплар  да савгъат этилип берилди.

Шо жумалыкъны ичинде Къарабудагъгент районну юртларында иш гёреген китапханаланы къуллукъчуларыны къасты булан оьтгерилген гьаракатларда яшлар сююмлю шаирлерини асарларын оху­гъандан къайры да, сагьналашдыргъан чыгъышларында халкъ ёммакъланы, гьалиги язывчуланы асарларыны игитлерини келпетлерин яратдылар. Гьар тюрлю ёлугъувлар, охув конференциялар, конкурслар, викториналар оьтгерилип  де тура.

 

Бизин мухбирибиз.