Пятница, 06.04.2018г. — «ЁЛДАШ».

Владимир Путин март айны 3-нде ва 4-нде эки гюнлюк сапары булан Анкарагъа баргъан. О Владимир Путинни президент болуп сайлангъан сонг биринчи тыш сапары болуп токътады.

 

Тюркияны тахшагьарында ол Россияны ва Тюркияны арасындагъы Оьр даражалы советни генгешинде ортакъчылыкъ этди. Ондан сонг Сирияны ёрукълашдырыв масъалагъа байлавлу уьч якълы ёлугъув болду. Онда баргъан делегацияны составында аслу тармакъланы ёлбашчылары ва уллу далапчылыкъ вакиллери де бар эди.

Россияны ва Тюркияны президентлерини арасында артдагъы йылларда бир де болмагъан даражада байлавлукъ юрюлегенни эсгерме тюше. Гетген йыл 8 керен ёлугъувлары, 20-дан да артыкъ телефон сёйлевлери болгъан. Бу сапар «Акъкъую» атом электростанцияны къурулушуна байлавлу башлана. Шо проектни умуми багьасы – 20 миллиард доллар. Шо харж толу кюйде Россияны янындан чыгъарыла. О станцияны къурулушу булан Россия Тюркияда юрюлеген атом тармакъны башында токътай.

Эки де пачалыкъны башчылары гюнлюк низамны барышында регион ва халкъара масъалаларына Сирияны да къошуп къарагъан. Ондан сонг пачалыкъланы башчылары Оьр даражалы кёмеклешив советни генгешине гёче. Онда лакъыр сатыв-алыв, экономика аралыкълагъа байлавлу юрюле. Мал айландырыв гетген йыл 22,1 миллиард долларны оьлчевюнде болгъан, алдагъы йыллар булан тенглешдиргенде шо санав 40,5 процентге артыкъ.

Энергетика тармакъ айрокъда тергевню тарта. Россияны газын сатып алывда Тюркия дюньяда экинчи ерни тута. «Тюркия агъым» деген газ барагъан быргъыланы къурув да уьс­тюнлю кюйде графикге гёре юрюле. О «агъымны» биринчи бутагъы булан газ Тюркиягъа, экинчи бутагъы булан башгъа тыш пачалыкълагъа баражакъ. Ону ишге салыв 2019-нчу йыл 30-нчу декабрге къаравуллана.

Генгешде юрт хозяйствону гьа­къында да айтыла. Бирдагъы-бир тема – туризм. Тюркия бизин ватандашлар кёп ял алагъан ер гьисаплана. 2017-нчи йылда Тюркияда Россияны 4,7 миллион ватандашы болгъан.

Арбагюн, 4-нчю мартда, Владимир Путин Иранны президенти Гьасан Ругьани ва Тюркияны Башчысы Режеп Тайип Эрдоган булан Сириядагъы гьалны ёрукълашдырыв масъаласына къарады. Шо сёйлешивлени натижасында чакъырыв къабул этилди.

 

Информагентликлени маълуматларына гёре.