Бугюнлерде Магьачкъала шагьардагъы Р. Гьамзатовну  атындагъы Милли китапханасында орта билим  берив ожакъларыны охувчулары учун тигилген опуракъланы выставкасы-ярмакюсю юрюле. Эсгерилген  выставка-ярмакюде Россияда  ва СНГ-ни уьлкелеринде иш гёреген  фабриклер тикген маллар сатывгъа  салынгъан.

Дагъыстанны билим беривге ва илмугъа къарайгъан министри Ягьия Бучаев сатывгъа салынгъан опуракълар барысы да дегенлей оьр сан янлы тигилгени гьакъда эсгерген. Шо гьакъда айта туруп, 2023-нчю йылда Санкт-Петербург шагьарда оьтгерилген халкъара экономика форумну  барышында Дагъыстанны Башчысы Сергей Меликов ва Чувашия Респуб­ликаны Башчысы ОлегНиколаев сатыв-алыв-экономика, илму-техника ва яшавлукъ-маданият тармакъларда  бирге  иш гёрювню гьакъындагъы разилешивге къол салгъанын эсгермеге тюше. Шолай да, шо йылны май айында оьтгерилген Россияны регионлары ва Уьзбекистан  ортакъчылыкъ этген форумну вакътисинде ДР-ни Гьукуматыны ва Уьзбекистанны арасында сатыв-алыв-экономика, илму-техника ва яшавлукъ-маданият тармакъларда бирге иш гёрювню гьакъындагъы разилешивге къол салгъан.  

Оьтгерилеген выстав­ка-ярмакюде  нече тюрлю опуракъны да сатып алмагъа бажарыла. Школагъа гийилеген шо  опуракълар Германияда, Японияда, Тюркияда  чыгъа­рагъан ясандырывларда тигилген. Дагъыс­танны экономика ва территория оьсювюне къа­райгъан министрлигини якълаву булан  юрюлеген выставка-ярмакю сентябр айны башлапгъы гюнлерине ерли узатылып туражакъ.  

Б. АЙБОЛАТОВ.