Сергей Меликов Дагъыстанны Халкъ Жыйынына этген Чакъырывундан сонг маълумат къуралланы вакиллери булан ёлугъув оьтгерди. Журналистлер онгаргъан соравланы кёбюсюне Сергей Алимович Чакъырывунда жаваплар къайтарды, тек бу ёлугъувда шолагъа дагъы да теренден къаралды.
Аслу гьалда хас асгер гьаракатда ортакъчылыкъ этегенлени къысматы гьакъда сёйленди. Дагъыстанны Башчысы шонда ортакъчылыкъ этегенлени гьарисине игит деп айтма ярайгъанны эсгере туруп, оланы ёлбашчылыкъ этме, адамланы бирикдирме ва къыйын гьалларда тюз гьасил чыгъарма бажарагъаны парахат яшавда тарыкъ болажагъын айтды.
–Гьаракатгъа бизден баргъанланы кёбюсю офицерлер, бёлюклени, роталаны, батальонланы, гьатта полкланы командирлери, — дей С.Меликов. –Оьтген 80 йылны алып къарасакъ да, давлар бузгъан шагьарланы шонда болгъанлар тургъузду, ёлбашчылар болуп ишледи. Биз де шоланы сынавун къоллажакъбыз, гьали яраланып къайтгъанланы иш булан таъмин этив масъалагъа къарайбыз.
Инвестицияланы гьакъында айта туруп, гьали Дагъыстангъа гелме ва оьзюню ишин юрютмеге сюеген маячыланы санаву артгъанны билдирди.
–Толу кюйде санагъанда олар бизин республикагъа 70 миллиард манат салма сюе, — деп давам эте С.Меликов. — Кёбюсю туризмге байлавлу идаралар къурма сюегенни айталар. Биз олагъа къурумлары бизде гьисапгъа тюшсюн, налоглары да Дагъыстанда къалсын деп шартлар салабыз. Шолай да,, «Темиркъазыкъ-Къыбла» деген аслу ёл Дагъыстандан оьте, шону яхшылашдырывгъа, генглешдиривге ва айланасын безендиривге де шайлы харжлар гёрсетилген.
Сергей Алимович, энергетикадагъы, газлардагъы ва транспортдагъы гьалланы яхшылашдырывгъа тергев артып турагъанны айтды. Магьачкъаланы айтып къойса да, 3 уллу транспорт компания къурулажакъ. Оланы янгы техника булан таъмин этивден къайры, гьариси не булан машгъул болма гереги белгили этилежек. Бириси шагьарны ичиндеги адамланы ташыжакъ, бирдагъысы ювукъ арадагъы юртлагъа ва шагьарлагъа баражакъ, уьчюнчюсю буса йыракъ мезгиллеге юрюжек.
Аслу гьалдагъы тергев Магьачкъала портгъа да этилежек. Россияны биргине-бир бузламайгъан портуна айрыча гелеген ёл этмек федерал оьлчевде якълав тапгъан. Дагъыстанны гёзел бойларына багъып элтеген ёллар да яхшылашдырылажакъ. Туристлер кёп къатнайгъан «Сарихум» къайыр тёбе, Дербент къала, «Солакъ коньон», «Самур агъачлыкъ», тавлардагъы бузулгъан юртлар ва башгъа ерлерде, ёллардан къайры да, башгъа онгайлыкълар болдурулма герек.
– Гьар адам оьзюне тапшурулгъан ишни намуслу кюйде юрютсе, алгъа барма имканлыкъ бола,– дей регионну башчысы. – Эгер де къазанаман деп яшлагъа пайдалы майны орнуна заралы барын бере буса, налоглар тёлемей яшыртгъын ишлейген къурумлар бар буса, элни малын сатып кисесине къаплай буса, биз алгъа бармасбыз. Бир далапчы къазанмакъ учун складын ижарагъа берген, башгъасы шону ичинде къоркъунчлу мал салгъан. Хатар болуп атылды ва 37 адамны жаны къыйылды.
Шолай да, Сергей Меликов «Динамо» футбол команданы, Алексей Гьасанов негер ишден тайгъанны, ЦУР-ну гёрмекли ишини гьакъында да айтды.
Ёлугъув пайдалы оьтдю, тек шонда Дагъыстанны Башчысы Чакъырывунда жавап бергенге де къарамай, такрарлап соравлар берилди. Бир-бир соравлар оьзлени белгилемек учун этилегендей де гёрюндю.
Жыйынны юрютген Дагъыстанны Башчысыны ва Гьукуматыны администрациясыны ёлбашчысыны орнунбасары, Дагъыстанны Башчысыны маълумат-политика управлениесини начальниги Рашит Акавов жыйынгъа гелгенлеге баракалла билдирди ва шулай ёлугъувлар чакъда-чакъда оьтгерилежекни де билдирди.
Г. КЪОНАКЪБИЕВ.
