Тотукъуш – энемжая

 

Янгур гюч этген отлар

Турма къыйнала, йылай.

Сув ашагъан уясын

Сыйыртгъыч уста сылай.

 

Орайгъан къара булут,

Акъ болма сюйкелише.

Тотукъуш – энемжая,

Кёкню бир янын теше.

 

Тонкътонкъ къуш япсарындан,

Башын чыгъарып къарай.

Тез-тез къурутма сююп,

Хораз къуйругъун тарай.

 

Шайтан ел

 

Шайтан ел кагъызлардан ,

Жымчыкъ этип  учура.

Тюнгюлюкге баш сугъуп,

Узун тартып къычыра.

 

Уюй ушатгъан ерде,

Хумдан багъана эте.

Гючю етгенни алып,

Мююш-къувушгъа элте.

 

Гьаясыз уланъяшдай

Ток теллер де сызгъыра.

Тас этгенин  излейми –

Юрт ичинден къыдыра.

 

Жават ЗАКАВОВ

 

Мени къозум

 

Алтын кёрпели къозум,

Ойнатып къашын-гёзюн,

Гелип къолумну ялай,

Балики, магъа ярай,

Гёресен,  база алай!

 

Тутма сюйсем ойнакълай…

Бюреп авзун оймакъдай

Магъа тигилип токътай.

Ойнама менден къайры

Гьеч дагъы адам ёкъдай.

 

Тутсам, алсам къолума,

Яшны йимик ялына.

Эки гёзю бурчакъдай,

Тюшме сюймей къучакъдан,

Бетим ялай, къучакълай.

 

Къозум инишкам йимик,

Йымышакъ Мишкам йимик,

Мен не айтсам да тынглай,

Сёйлесем сёзюм англай.

Къурдашгъа мени танглай.

 

Шолай мени къозум бар…

Улан тюгюл, къызым бар.

Оьсюп уллу къой болар,

Къозлар о да къозулар,

Гюрен къозудан толар.

 

Агъы булан сариси…

Къозуланы бирисин

Айырарман, аларман,

Къайтып къурдаш боларман,

Къурдаш кюйде къаларман.