Россияны Президенти В. Путин – Халкъара форумда

Санкт-Петербургда гьар йыл оьтгерилеген Халкъара экономика форумда, Россиягъа къаршы санкциялагъа да къарамай, бу гезик де кёп адам ортакъчылыкъ этди. Жыйылгъанлагъа оьзлени къутлавларын Къазахстанны Президенти Къасым-Жомарт Токаев, Китайны Башчысы Си Цзиньпин ва Египетни президенти Абдельфаттагь Сиси йибердилер.

Оьзюню сёйлевюнде Россияны Президенти Владимир Путин, айланадагъы пачалыкълар билдирген къаршылыкъгъа да къарамай, ватандашлар бирикгенни ва сыкълашгъанны гьакъында айтды. Ол энниден сонг бизин пачалыкъ не ёл танглажакъны ва далапчылагъа этилежек кёмек­лени де эсгерди. Ингдеси, ипотека кёмекни 9 процентден 7-ге тюшюрме къаралып турагъанны эсгерди.

Президентни сёйлевюню аслу маънасы гьакъда да айтайыкъ:

– Россия, айланадагъы къысаслыкъгъа да къарамай, янгыр­тыв ишлер булан машгъул бола, жаваплыкъ арта ва бизден тайып турагъан тыш пачалыкъланы компанияларыны орнуна россиялылар геле.

– Ипотека енгиллеше ва 7 процентге ерли тюшежек, шо чара йылны ахыры болгъанча юрюлежек.

– Россия иш гьаракатны жанландыражакъ ва ишлеме сюеген пачалыкълар булан дослукъ аралыкълар юрютежек.

– Халкъгъа заралы тиймейген гьаракат этеген далапчылагъа, оланы артыкъ тергевлерден азат этип, кёмек болдурулажакъ.

– Адамлардан акъча жыйып­ этилеген уллу уьйлер къурагъанлар даим тергевню тюбюнде туражакъ.

– ЖКХ-ны масъалаларын толу кюйде чечеген программалар янгыртылажакъ.

– Россияны ичиндеги туризмни де толу кюйде къоллама герек, бу йыл бизин уьлкеде 12 миллиондан да артыкъ турист болажакъ деп гьисап этиле.

– Башгъа пачалыкълардан харлысыз, олагъа табисиз янгылыкълар болдуруп, оьз производствобузну янгыртывгъа къаралажакъ.

– Гьазир иш майданланы къоллама сюегенлеге йылгъа 5 процент болагъан кюйде ипотекалар берилежек.


Форумда ортакъчылыкъ этген Дагъыстанны Башчысы Сергей Меликов да кёп тюрлю иш къурумланы башчылары ва министрлер булан ёлукъду ва пайдалы дыгъарлар байлады.

Бизин мухбирибиз.