Гьар йыл да мердешленип гелегенде йимик, ана тиллени Халкъара гюнюню алдында «Дагъыстан авторланы асарларын ана тилинде инг яхшы чебер охувчу» деген республика къараву оьтгериле. Дагъыстанны билим беривге ва илмугъа къарайгъан министерлигини сиптечилиги булан юрюлеген шо къаравну башлапгъы тиретлери районланы ва шагьарланы оьлчевюнде юрюле.
Шолай, алдагъы гюнлерде Тотурбийкъаладагъы орта школада (Хасавюрт район) эсгерилген къаравну район тирети оьтгерилген. Шону барышында алдынлы ерлеге ес болгъан къумукъ яшланы гьакъында айтгъанда, Яхсайдагъы бир номерли орта школаны охувчусу Казим Тагьиров ва Эндирейдеги уьч номерли орта школаны охувчу къызы Жамиля Сайпутдинова биринчи ерлеге ес болгъан. Экинчи ерни Кёстекдеги орта школаны 11-нчи класында охуйгъан Камиля Биймурзаева ва Къарланюртдагъы орта школадан гелген Жамиля Биярсланова оьзлени арасында бёлген. Шо гьакъда Хасавюрт районну билим берив управлениесини Telegram-каналында билдириле.
Белгили экени йимик, районларда ва шагьарларда алдынлыкъ алгъанлар ювукъ гюнлени ичинде шо къаравну республика тиретинде ортакъчылыкъ этежек.
Насрулла БАЙБОЛАТОВ.
