Магьачкъаладагъы Дагъыстан техника университетни «Рагьмулу иш эт» деген отрядыны студентлери Донецк ва Луганск республикалардан гелген агьлюлер учун онгарылгъан 10 тон яшавлукъ учун тарыкъ болагъан малланы юклеп, Ростов областгъа бакъдыргъан.
Алда да оьзлени яшайгъан ерлеринден дав агьвалатлар себеп болуп, Россияны топурагъына чыкъгъанлар учун Дагъыстандан кёмек йиберилген эди. Шо кёмекни жыймакъ учунгъу чарагъа рагьмулукъну фондлары, жамият къурумлар ва бирлешивлер, Бютюнроссия къурумланы регион бёлюклери къошулгъан эди.
Рагьмулу ишлени этеген гёнгюллюлер инг башлап яшлар ва уллулар учун опуракълар ва аякъгийимлер онгара. Сонг да, ашамлыкъ продукталардан гьар тюрлюлерин ва ичеген сувлар йибере.
− Дагъыстанлылар бир заманда да оьзгелени къыйынына сесленмей къалмагъан. Биз оьзюбюзнюкилени тергевсюз, кёмексиз къоймайбыз. Украинадан чыгъагъан адамлар бек къыйынлы гьалдалар ва биз олагъа кёмек этмей ягъада къалып болмайбыз. Россияны топурагъына чыкъгъанлагъа некъадар онгайлыкълар болдурма къаражакъбыз. Оланы кёплери агьлюлери, яшлары булан гелген. Яшлар учун тарыкъ болагъан ашамлыкъланы да онгаргъанбыз. Бу бир керен этилеген кёмек тюгюл. Энниден сонг да бизин къолубуздан гелеген кёмекни олар учун этме къастыбыз бар, – деген отрядны ёлбашчысы Айида Мустапаева.
